Atyraý oblysynda eńbek demalysynda júrgen polıtseı uryny ustady
Oblystyq polıtsııa departamenti baspasóz qyzmetiniń málimetine qaraǵanda, tártip saqshylaryna Jylyoı aýdanyndaǵy Shoqpartoǵaı aýylynyń 60 jastaǵy turǵyny Jaýymbaı Mushaqulov júgingen.
«Shaǵymdanýshy belgisiz bireýdiń ákesiniń úıine terezesin syndyryp kirip, turmystyq buıymdardy urlap ketkenin habarlady. Alaıda, sol aýyldyq okrýgtegi ýchaskelik polıtsııa ınspektory Nurǵısa Jamalbekov kezekti eńbek demalysynda bolǵan. Inspektor demalysta júrgenine qaramastan qylmysty ashýǵa jumystandy. Nátıjesinde kúdikti retinde sol aýylda turatyn 1987 jylǵy er adam anyqtalyp, ustaldy. Urlanǵan turmystyq buıymdardyń quny 200 myń teńgeden asady. Kúdikti urlaǵan zattardy ıesine qaıtaryp berdi. Al, kúdiktige qatysty QR Qylmystyq kodeksiniń 188-babynyń 3-bóligimen sotqa deıingi tergeý júrip jatyr» -dep habarlady departamenttiń baspasóz qyzmeti.
Eńbek demalysynda júrse de uryny ustaǵan Nurǵısa Jamalbekovtiń sheni – polıtsııa maıory. Ol 10 jyldan beri Jylyoı aýdanyndaǵy Shoqpartoǵaı aýylynda ýchaskelik polıtsııa ınspektory bolyp jumys isteıdi.
«Jumys istep júrgen adamdar eńbek demalysyn asyǵa kútedi. Óıtkeni, bul – jylyna bir ret alańsyz demalýǵa beriletin múmkindik. Biraq, eńbek demalysynda júrgenmen, meniń aryzymdy qarap, uryny ustaǵan Nurǵısa Jamalbekovke alǵysymyz sheksiz. Aýylymyzda jumysyn jaýapkershilikpen atqaratyn osyndaı ınspektor bar kezde qaýipsizdigimizge alańdamaıtyn boldyq. Turǵyndarmen udaıy qarym-qatynas ornatyp, kómek berýge daıyn turatyn polıtseıdi qorǵanymyz sanaımyz» - deıdi Shoqpatoǵaı aýylynyń turǵyny Jaýymbaı Mushaqulov.
Eske sala ketelik, buǵan deıin Atyraýda urlanǵan kólik 15 mınýtta ıesine qaıtarylǵanyn jazǵan bolatynbyz.