Atyraý oblysynda elektr jelisin kúsheıtý jobasy júzege asyrylyp jatyr
Mınıstrdiń deregine súıensek, qazir «QR BEJ batys aımaǵynyń elektr jelisin kúsheıtý» jobasy júzege asyrylyp jatyr.
«Atyraý oblysy men Atyraý qalasyn elektr energııasymen jabdyqtaýdy negizinen «Atyraý jylý-elektr ortalyǵy» AQ men «Karabatan Utility Solutions» JShS-niń gaz týrbınaly elektr stansasy júzege asyrady. Bıylǵy jyldyń 7 aıynda óńirde 4,268 mlrd kVt/saǵ elektr energııasy óndirildi. Jalpy oblystyń ishki tutyný kólemi– 3,9 mlrd kVt/saǵ», -dedi mınıstr Bolat Aqsholaqov.
Qazir Atyraý oblysyn aldaǵy jylytý maýsymyna sapaly jáne ýaqytyly daıyndaý maqsatynda «Atyraý jylý-elektr ortalyǵy» AQ 3 qazandyq agregaty men 2 týrboagregatyna, 13,2 shaqyrym jylý jelisine jóndeý jumystaryn júrgizip jatyr.
«Batys Qazaqstan men Atyraý oblystary ótkizý qabileti 100 MVt bolatyn 220 kVt elektr berý jelisine qosylǵan. Osy jelide jóndeý júrgizilgen kezde Atyraý jáne Mańǵystaý oblystarynyń energııa júıeleri oqshaýlanǵan jumys rejımine kóshedi. Bul tutynýshylardyń elektrmen jabdyqtaý senimdiligine teris áser etedi. Sol sebepten, qazir atalǵan mindetti oń sheshý úshin «QR BEJ Batys aımaǵynyń elektr jelisin kúsheıtý» jobasy iske asyrylyp jatyr. Osy joba Atyraý oblysynyń tutynýshylaryn elektrmen jabdyqtaýdyń ótkizý qabileti men senimdiligin arttyrýǵa múmkindik beredi», -dep málim etti Energetıka mınıstri.
Atalǵan jobanyń jumysyn 2024 jyly aıaqtaý josparlanyp otyr.
Eske sala ketelik, buǵan deıin Atyraý oblysynyń aýyldaryn gazdandyrýǵa 1 mlrd teńge bólingenin habarlaǵan bolatynbyz.