Atyraý oblysynda elektr qýatynyń tarıfi 12,17 paıyzǵa ósti
Tabıǵı monopolııalardy retteý komıteti Atyraý oblysy boıynsha departamentine «Atyraý Jaryq» AQ-nyń elektr energııasyn berý jónindegi rettelip kórsetiletin qyzmetine tarıf bekitýge baılanysty ótinim túsken. Osy kezge deıin elektr qýatynyń tarıfi qosymsha qun salyǵynsyz 1 kVt/s úshin 5,84 teńge bolǵan.
«Ótinim berýdiń negizgi sebebi – ortasha aılyq jalaqyny ósirý. «Atyraý Jaryq» AQ usynǵan jobada tarıf qosymsha qun salyǵynsyz 1 kVt/s úshin 7,11teńgeni qurady. Jańa tarıfti buryn bekitilgen tarıften 1,27 teńgege nemese 21,84 paıyzǵa arttyrý kózdelgen. Departament mamandary monopolıst sýbektiniń ótinimine muqııat taldaý júrgizdi. Sóıtip, tarıfti 1 kVt/s úshin qosymsha qun salyǵynsyz 6,55 teńge mólsherinde bekitý týraly sheshim qabyldandy. Munda tarıftiń ósýi bekitilgen tarıften 0,71 teńgege nemese 12,17 paıyzǵa ósip otyr. Tarıftiń ózgerýi óndiristik personaldyń jalaqysyn 2023 jylǵy 1 maýsymnan bastap 103,1%-ǵa arttyrýdy kózdeıdi. Tutastaı alǵanda, tarıf belgileý protsesi jarııalylyq pen ashyqtyqty qamtamasyz etýdi eskere otyryp, monopolıst sýbektilerdiń usynylǵan materıaldaryna negizdeldi», -dep habarlady jergilikti departamenttiń baspasóz qyzmeti.
Eske sala ketelik, budan buryn Atyraýda elektr qýatynyń qaıta-qaıta óshýine ne sebep bolǵanyn jazǵan edik.
«Batys aımaqtyq elektr stantsııalaryndaǵy generatsııalanatyn qýattyń jetispeýshiligine jáne 220 kV Oral-Atyraý tranzıt jelisindegi qýattyń kóbeıýine baılanysty tranzıt jelilerindegi shekti rejım kezinde júktemeni óshirý arnaıy avtomatıkasy iske qosylady. Atalǵan avtomatıka bir nemese birneshe qamtý jelilerin óshirý sekildi apattyq keleńsizdikter kezinde júkteme túıininiń turaqtylyǵyn saqtaý úshin jumys isteıdi», -dep habarlady energetıkalyq keshenniń baspasóz qyzmeti.
