Atyraý oblysynda eki kúnde 3 kólik órtenip ketti
Atyraý oblystyq tótenshe jaǵdaılar departamentiniń baspasóz qyzmetinen málim etkendeı, kólikterdiń órtený deregi 24 jáne 25 jeltoqsanda tirkelgen.
«Alǵashqy órt týraly habar 24 jeltoqsanda saǵat 11:07-de tústi. Atyraý qalasyndaǵy M. Áýezov kóshesinde ornalasqan kólik jóndeý ortalyqtarynyń birinde «Toyota Sienna» markaly avtokólik órtendi. Bul kólik Armenııa Respýblıkasynda tirkelgen. Órt sóndirý bólimshesiniń qyzmetkerleri shaqyrtý ornyna jetken kezde avtokólik tolyq janyp ketken. Avtokólikte gaz qondyrǵysy ornatylǵan. Órt sóndirýshiler jalyndy saǵat 11:58-de sóndirip, gaz qondyrǵysynyń jarylý qaýpiniń aldyn aldy», - dep habarlady departamenttiń qoǵammen baılanys toby.
Ekinshi órt te sol kúni jergilikti ýaqytpen saǵat 14:29-da bolǵan. «Atyraý-Oral» tas jolynyń boıynda Almaly aýylynyń tusyndaǵy polıtsııa beketiniń mańynda «Chance» avtokóliginiń qozǵaltqysh bóligi órtengen. Jalyn saǵat 14:55-te aýyzdyqtaldy.
Al, keshe, 25 jeltoqsanda saǵat 11:31-de Jylyoı aýdanynda taǵy bir kólik órtendi. Aýdan ortalyǵy – Qulsary qalasynyń óńdiristik aımaǵynda «KamAZ» kóligi túgi qalmaı janyp ketti. Órt saǵat 12:03 saǵatta tolyqtaı sóndirildi.
Qazir kólikterdiń órtený sebebi anyqtalyp jatyr.
«Júrgizýshilerdiń avtokóliktiń elektr jelilerin udaıy teksergeni jón. Bul kólikti órtený qaýpinen saqtaıdy. Órt qaýipsizdigi erejelerin qatań saqtalǵanda ǵana oqys oqıǵanyń aldyn alýǵa bolady», - dep málim etti departamenttiń qoǵammen baılanys tobynan.
Eske sala ketelik, buǵan deıinAtyraý oblysynda órtengen jataqhanadan 9 adam qutqarylǵanyn habarlaǵan edik.
Foto: Tótenshe jaǵdaılar departamenti
