Atyraý oblysynda eki kúnde 11 myń gektar alqap janyp ketti
ATYRAÝ. QazAqparat –Atyraý oblysynyń Qyzylqoǵa aýdanynda eki kúnde 11 530 gektar jerdiń qurǵaq shóbi órtenip ketti, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń málimetinshe, 12 shilde kúni saǵat 12:25-te aldymen, Saǵyz aýyldyq okrýginen 70 shaqyrym qashyqtaǵy Tasqudyq eldi mekeninde qurǵaq shóp tutanǵan. Dala órti túngi saǵat 23:25-te oqshaýlandyrylyp, 13 shildede saǵat 00:30-da tolyqtaı sóndirilgen. Oǵan Muqyr aýyldyq okrýginiń 15 turǵyny men 1 tehnıka, Kenbaı ken ornynan 5 adam men 1 tehnıka tartylǵan. Jalyn naızaǵaıdyń túsýinen bolǵan.
Sol kúni, saǵat 12:30-da atalǵan aýdan aýmaǵyndaǵy Tasshaǵyl aýyldyq okrýginen 36 shaqyrymdaǵy Apantaı, Japalaq-1, Japalaq-2, Qosoba, Ájibaı, Qaraǵaı, Ushaq ushy, Aıǵyrshaǵyl, Jýaly, Qosbıek, Shárip, Ámir, Baıqońyr ýchaskelerinde de qurǵaq shóp jandy. Bul ýchaskelerde órt 13 shildede saǵat 03:30-da oqshaýlandyrylyp, tańǵy saǵat 04:20-da tolyǵymen aýyzdyqtaldy. Munda da dala órti naızaǵaıdan tutanǵan. Tótenshe jaǵdaılar departamentiniń 7 qyzmetkeri men 1 tehnıkasy, Tasshaǵyl, Kózdiqara, Mııaly aýyldarynan 26 adam men 9 tehnıkasy jalynmen kúreske jumyldyryldy.
Sondaı-aq, 13 shildede Tasshaǵyl aýyldyq okrýginen 15 shaqyrym jerde dalaly aýmaq órtendi. Al Qaraǵaı, Qaraqudyq, Baıbek, Ájibaı ýchaskelerinde 650 gektar aýmaqtyń qurǵaq shóbi janyp ketken. Bul ýchaskelerdegi jalyndy aýyzdyqtaýmen erikti jasaqtardyń 80 adamy aınalysty. Oǵan 10 tehnıka tartyldy. Órt saǵat 23:20-da tolyqtaı sóndirilgen.
«Eki kúnde tirkelgen dala órtterinen zardap shekkender joq. Eldi mekenderge qaýip tónbegen», - dedi departamentten.
