Atyraý oblysynda eki kólik soqtyǵysyp, úsh adam mert boldy
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy keshe, 24 shildede saǵat 23:00 shamasynda bolǵan.
Respýblıkalyq mańyzy bar «Atyraý-Oral» tasjolynyń 19-shaqyrymy tusynda «Toyota Prada» men «VAZ» avtokólikteri soqtyǵysqan. Jol-kólik oqıǵasynyń saldarynan «VAZ» avtokóliginiń júrgizýshisi men eki jolaýshysy oqıǵa ornynda kóz jumdy. Atalǵan jol apatynan jaraqat alǵandar da bar.
Al, Isataı aýdanynda jergilikti ýaqytpen saǵat 17:00 shamasynda taǵy jol-kólik oqıǵasy tirkelip otyr.
Aýdan aýmaǵyndaǵy S.Balǵymbaev jáne Qamysty ken oryndarynyń aralyǵyna tartylǵan jol boıynda «Land Rover» markaly avtokóligi aýdarylyp qalǵan. Oǵan kólik júrgizýshisiniń basqarý júıesin ıgere almaǵany sebep bolǵan.
Jol jıegine aýdarylǵan kóliktiń júrgizýshisi men jolaýshylary ártúrli dene jaraqatyn alǵan. Zardap shekkenderdi jedel járdem brıgadasy Isataı aýdandyq ortalyq aýrýhanaǵa jetkizdi.
Qazir polıtsııa qyzmetkerleri atalǵan jol-kólik oqıǵalarynyń sebebin anyqtaý úshin tergeý amalyn bastady.
Buǵan deıin Atyraý oblysynda alty aıda jol apatynan 40 adam mert bolǵanyn habarlaǵan edik.
«Jol-kólik oqıǵalarynyń birneshe sebebin aıtýǵa bolady. Birinshiden, qarsy baǵyttaǵy jolaqqa shyǵý, ekinshiden jaıaý júrginshilerdi qaǵý, úshinshiden jol qıylystarynan ótý erejesin buzý, tórtinshiden jyldamdyqty shamadan tys asyrý. Oblys aýmaǵynda jyl basynan beri jyldamdyqty shamadan tys asyrǵan 153 myńnan, qarsy baǵytqa shyqqan 130-dan, jaıaý júrginshilerge jol bermegen 800-den, jaıaý júrginshilerge arnalǵan jolaqtan ótý kezinde 5 myńnan astam quqyq buzýshylyq deregi anyqtaldy», -deıdi jergilikti polıtsııa qyzmeti basqarmasynyń basshysy, polıtsııa polkovnıgi Erlan Bıǵambaev.