Atyraý oblysynda eki kólik soqtyǵysyp, 7 adam mert boldy
Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 16 shildede bolǵan.
«Jergilikti ýaqytpen saǵat 15:00 shamasynda Dossor-Qulsary-Beıneý baǵytyndaǵy tasjolynyń 82-shaqyrymy tusynda Chevrolet Cobalt markaly avtokóligi joldyń qarsy jolaǵyna shyqqan. Saldarynan Toyota Ipsum avtokóligine soqtyǵysqan. Jol-kólik oqıǵasynyń saldarynan Chevrolet Cobalt kóliginiń júrgizýshisi men 4 jolaýshysy, Toyota Ipsum kóliginiń júrgizýshisi men 1 jolaýshysy oqıǵa ornynda qaza tapty. Al, 2 jolaýshy túrli dene jaraqatymen Jylyoı aýdandyq aýrýhanasyna jetkizildi», -dep habarlady Atyraý oblysy polıtsııa departamenti janyndaǵy patrýldik rotasynyń komandıri polıtsııa kapıtany Ádilbek Shahmetov.
Qazir polıtsııa qyzmetkerleri jol-kólik oqıǵasyna baılanysty tıisti is-qujattar jınaqtap jatyr.
«Kólik júrgizýshilerine jol apatynyń arty aýyr zardapqa ákelip soqtyratynyn eskertemiz. Sol sebepten, júrgizýshiler óziniń jáne ózgeniń ómiri men densaýlyǵyna nemquraıly qaramaǵany jón. Jol apatyna ushyraǵan eki avtokóliktiń júrgizýshisi buryn birneshe ret kólik jyldamdyǵyn shamadan tys arttyrǵany úshin jaýapkershilikke tartylǵany anyqtalyp otyr», -dep málim etti Ádilbek Shahmetov.
Eske sala ketelik, buǵan deıin Atyraýda 4 kólik soqtyǵysyp, eki adam kóz jumǵanyn jazǵan edik.
Sondaı-aq, Atyraýda jol-kólik oqıǵalary saldarynan mert bolǵandar sany 8,8%-ǵa óskenin habarlaǵan edik.
Atyraý oblystyq polıtsııa departamentiniń bastyǵy Nurhat Orazbaevtyń aıtýynsha, bıylǵy 5 aıda jol-kólik oqıǵasy 5,4%-ǵa tómendegen. Alaıda mert bolǵandar sany 8,8%-ǵa ósken.
