Atyraý oblysynda eki balany urlaǵan áıeldi dárigerler tekserýde
ATYRAÝ. QazAqparat - Atyraý oblysynda juma kúni túnde Maqat aýylynda eki balany urlap ketken áıeldi dárigerler tekserýde, dep habarlaıdy «QazAqparat» HAA tilshisi.
«Maqatta eki balany urlaǵan áıel Atyraý oblysy, Maqat aýdandyq sotyna túsken tergeý organdarynyń áıeldi májbúrli túrde tekserýden ótkizý týraly ótinishi boıynsha 30 kúnge medıtsınalyq mekemege ornalastyrylǵan. Medıtsına qyzmetkerleri áıel balalardy urlaǵande aqyl-esi durys boldy ma, joq pa, sony anyqtaýy qajet», - deıdi oblystyq prokýratýranyń baspasóz qyzmetindegiler.
Eske sala ketsek, buryn Atyraý oblystyq prokýrory Ernat Sabynqulovtyń habarlaǵanyndaı, beısenbi kúni shamamen keshki 20:30-darda Maqat aýdandyq ІІB-ne Maqat aýylynda bes jasar bala men tórt jasar qyzdyń joǵalǵany týraly habar túsken. Dabyl berilip, aýdandyq polıtsııanyń búkil jeke quramy izdeý jumysyna kirisken. Prokýratýra organdarynyń úılestirýi boıynsha balalardy izdestirýge prokýratýra, polıtsııa jáne ákimdik qyzmetkerlerinen tys, belsendi azamattar da jumylǵan.
Shamamen 22:20-da adamdardyń balalardyń belgisiz áıelmen birge taksıge mingenin kórgeni týraly habar kelgen. Sonymen qatar izdestirý jumystary kezinde sol mańda beısaýat áıeldiń júrgeni týraly habarlar taraǵan. Іzdestirý aımaǵy keńeıtilip, oǵan kórshi aýyldar men aýdan ortalyqtarynyń quqyq qorǵaý organdarynyń qyzmetkerleri de jumyldyrylǵan. Bul taktıka nátıje berdi.
Juma kúni tańǵy 4-te balalar úıinen 150 km qashyqtyqta, Jylyoı aýdanynyń Qulsary qalasynan tabylǵan. Balalardyń densaýlyǵyna zaqym tımegen. Qazirgi kezde Qylmystyq kodekstiń 125-baby («Adam urlaý») boıynsha sotqa deıingi tergeý amaldary júrgizilýde.
