Atyraý oblysynda demalys kúnderi karantın engiziledi

ATYRAÝ. QazAqparat – Atyraý oblysynda 27-29 maýsymda qosymsha shekteý engiziledi. Sáıkes ózgeris óńirdiń bas sanıtar dárigeriniń qaýlysynda kórsetilgen, dep habarlaıdy QazAqparat tilshisi.

«2020 jyldyń 27 maýsymy saǵat 00:00-den bastap 29 maýsym 00:00-ge deıin Atyraý oblysynyń aýmaǵynda qosymsha shekteý sharalary engizilsin. Aıryqsha qajet bolǵan jaǵdaıdy qospaǵanda, azamattardyń qozǵalysyna tyıym salynsyn. 65 jastan asqan adamdarǵa kóshege shyǵýǵa bolmaıdy. Saýda-oıyn-saýyq ortalyqtarynyń, saýda ortalyqtarynyń, azyq-túlik jáne azyq-túlik emes bazarlarynyń, azyq-túlik jáne azyq-túlik emes saýda jelileriniń qyzmeti toqtatylsyn. «Úıde ornalasqan dúkenderdiń» jumys ýaqyty 10.00-den 20.00-ge deıin jalǵasady. Úıge deıin jetkizip beretin qoǵamdyq tamaqtaný oryndaryn qospaǵanda, barlyq qoǵamdyq tamaqtaný nysandary, fıtnes-ortalyqtar men basqa da sporttyq nysandar, sán salondary, shashtarazdar, SPA-ortalyqtar men salondar, qoǵamdyq monsha, basseınder, saýnalardyń jumysy toqtatylady» delingen bas sanıtar dárigerdiń qaýlysynda.

Oblys ortalyǵynyń turǵyndaryna parkterge, saıabaqtarǵa, jaǵalaýlarǵa, jaǵajaılarǵa jáne basqa da demalys oryndaryna barýǵa ruqsat etilmeıdi.

Osy kúnderi qoǵamdyq kólik te toqtaıdy.