Atyraý oblysynda dárigerler memleket usynǵan qyzmettik páterin jalǵa berip kelgen

ATYRAÝ. QazAqparat - Atyraý oblysy Jyloı aýdanynyń ákimdigi Qulsary qalasyndaǵy dárigerlerdi qyzmettik baspanadan shyǵarýǵa qatysty pikir bildirdi, dep habarlaıdy QazAqparat tilshisi.

Áleýmettik jelilerde Atyraý oblysynda Jylyoı aýdandyq ortalyq aýrýhanasynyń dárigerleri qyzmettik turǵyn úıden shyǵarý týraly habarlama aldy degen aqparat taraǵan.

Aýdandyq ákimdikte bolǵan jaǵdaıǵa qatysty túsinikteme berildi.

«Jylyoı aýdany ákiminiń Qulsary qalasynda halyqpen kezdesýi barysynda U.Ábdirahmanov kóshesiniń turǵyndarynan dárigerler men muǵalimderge berilgen qyzmettik páterlerdiń úshinshi adamdarǵa jalǵa berilgeni týraly aryz-shaǵym tústi. Turǵyndardyń ótinishine baılanysty aýdan ákimi Jumabek Qarajanov «Jylyoı aýdandyq turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bólimine joǵaryda atalǵan jaǵdaı boıynsha tekserý júrgizýdi tapsyrdy. Tekserý qorytyndysy boıynsha qyzmettik páter berilgen eki dárigerdiń onda turmaıtyny anyqtaldy. Páterler úshinshi adamdarǵa jalǵa berilgen. Bul fakti anyqtalǵannan keıin páter ıelerine túsindirý jumystary júrgizildi. Qyzmettik páterler Jylyoı aýdandyq turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bólimi balansyna qaıtaryldy», dep habarlady Jylyoı aýdany ákimdiginiń baspasóz qyzmeti.

Qyzmettik baspana dárigerlerge Jylyoı ortalyq aýdandyq aýrýhanasynan berilgen bolatyn.