Atyraý oblysynda dári-dármektiń úsh aılyq qory bar
ATYRAÝ. QazAqparat –Atyraý oblysynda dári-dármektiń úsh aılyq qory bar, dep habarlaıdy QazAqparat.
Oblystyq Densaýlyq saqtaý basqarmasy basshysynyń mindetin ýaqytsha atqarýshy Ashan Baıdýálıevtiń málimetinshe, medıtsınalyq uıymdarda qajetti dárilerdiń, onyń ishinde koronavırýsqa qarsy preparattardyń jetkilikti qory jasaqtalǵan.
«Atyraýdaǵy dárihanalar jelisinde dárilik zattardyń tómendemeıtin qoryn qamtamasyz etý úshin «Atyraý» áleýmettik-kásipkerlik korporatsııasy» AQ arqyly asa qajetti 40 túrli dárilik zattar satyp alyndy. Qazir dári-dármektiń birazy oblystyń 164 dárihanasyna jetkizilip, qalǵany turaqtandyrý qorynyń qoımasynda saqtaýly tur. Oblysta dári-dármekterdiń 3 aıǵa deıin azaımaıtyn qory jasaqtaldy. Buǵan qosa, demeýshilik kómekpen dárilik zattardyń 9 ataýy boıynsha dári-dármek jetkizildi. Medıtsınalyq maskalar men birrettik qolǵaptar da jetkilikti», - dedi Ashan Baıdýálıev.
Eske sala ketelik, budan buryn Atyraý oblysynda 224 jasandy tynys alý apparattary men 977 ottegi kontsentratory baryn jazǵan edik.
