Atyraý oblysynda dalaǵa taǵy da las sý tógilip jatyr
«AQIQAT» qoǵamdyq birlestiginiń tóraǵasy Ǵazız Ǵabdýllınniń aıtýynsha, las sýdyń tógilgen jeri Maqat aýdanynda.
«KPI kompanııasy men oǵan merdigerlik qyzmet kórsetýshi kompanııalar budan buryn da, qazir de zaýyttyń artyna ekologııamyzǵa zııandy qaldyqtardy tógip júr. Bul áreketteri úshin buryn jaýapkershilikke tartyldy. Qazirgi ýaqytta ekologııamyzǵa qaıtalama zalalyn keltirýde. Qanshama gektar jaıylym jerdi búldirip jatyr», -dep jazady Ǵazız Ǵabdýllın.
Oblys ákiminiń orynbasary Jasulan Bısembıev QazAqparat tilshisine habarlaǵandaı, tabıǵat paıdalaný jáne tabıǵı resýrstardy retteý basqarmasy áleýmettik jelilerdegi aqparatpen tanysyp, ekologııa departamentine hat joldaǵan.
Kórsetilgen faktiniń anyq-qanyǵyna kóz jetkizý úshin gaz-hımııa kesheninde jáne servıstik kompanııalarda jospardan tys tekserý júrgiziledi. Nátıjesi qosymsha habarlanady.
Eske sala ketelik, budan buryn Atyraýda las sýdan kól jasaǵan kásiporynǵa 10 mln teńge aıyppul salynǵanyn jazǵan bolatynbyz.
Atyraý oblystyq ekologııa departamentiniń basshysy Álibek Bekmuhametovtiń málimetinshe, arnaıy ekonomıkalyq aımaqta ornalasqan kásiporyn las sýdy dalaǵa tógip, sonyń saldarynan jasandy kól túzilgen.
«Áleýmettik jelide atalǵan seriktestiktiń jer astyna kómilgen qubyrdan quramy belgisiz las sýdy jer betine ruqsatsyz tókkeni týraly beınejazbalar jarııalanǵan. Osylaısha, «Karabatan Utility Solutions» JShS tarapynan ekologııalyq zańnama talaby buzylǵan. Osyǵan baılanysty departament qyzmetkerleri jospardan tys tekseris júrgizdi. Tekserý qorytyndysy boıynsha kórsetilgen derekter rastaldy. Qazir seriktestikke zańbuzýshylyq faktisi boıynsha ákimshilik is qozǵaldy. QR Ákimshilik quqyq buzý týraly kodeksi 328-babynyń 1-tarmaǵymen qorshaǵan ortaǵa emıssııanyń normatıvin asyrǵany úshin ákimshilik jazaǵa tartylyp, 10 mln 448 myń teńge aıyppul salyndy», - dep habarlady Álibek Bekmuhametov.
Sondaı-aq, Atyraý oblysynda munaıǵa uqsas suıyqtyq tógilgen jer tabylǵanyn, onyń eki jyldan beri tazalanbaǵanyn habarlaǵan edik.
