Atyraý oblysynda bıýdjettiń 3 mıllıard teńgesi ıgerilmeı qalǵan
Óńirlik kommýnıkatsııalar qyzmetiniń málimetine súıensek, oblystyq qarjy basqarmasy basshysynyń mindetin atqarýshy Serik Demegenov bıýdjet qarajatynyń ıgermeýdiń birneshe sebebin ataǵan.
«Bıýdjettik baǵdarlama ákimshileri qarjylandyrý josparlaryn naqty josparlamaıdy. Aldyn ala taldaý jasalmaıdy. Sonymen qatar, merdigerler de jumys kestesin saqtamaıdy. Atap aıtqanda, qarjyny ıgermeý qurylys, aýyl sharýashylyǵy, veterınarııa, densaýlyq saqtaý, bilim berý, kásipkerlik, jumyldyrý daıyndyǵy salalarynda tirkelip otyr» - dedi Serik Demegenov.
Onyń aıtýynsha, Almaly aýylynyń jańa shaǵyn aýdandaryna elektr jelilerin tartýǵa 305 mln teńge, Atyraý qalasynyń sol jaǵalaýyndaǵy kanalıtsazııalyq tazartý qondyrǵysy qurylysy bólingen 1 293,3 mln teńge, aýyl sharýashylyǵy basqarmasynda sýbsıdııalaýǵa baılanysty 7,4 mln. teńge ıgerilmeı qalǵan.
Osyǵan oraı oblys ákimi Mahambet Dosmuhambetov qarjyny ıgere almaı otyrǵandardy syn sadaǵyna ilip, suraqtyń astyna aldy. Atyraý qalasy men aýdandar ákimderine, tıisti basqarmalarǵa naqty tapsyrmalar júktedi.
«Qarjy sizderdiń bergen usynystaryńyz ben suranymdaryńyzdyń negizinde bólinip otyr. Sondyqtan, qarjyny ýaqytynda ári tıimdi paıdalanyp, ıgerýdi tapsyramyn» -dedi Mahambet Dosmuhambetov.
Jyl basynan beri oblystyq bıýdjettiń kiris kólemi 167 mlrd 617,4 mln teńgeni qurap otyr. Onyń ishinde respýblıkalyq bıýdjet transfertteri 25 mlrd 262,7 mln teńge bolsa, kredıtter 4 mlrd 597,6 mln teńgege jetken.
Oblys ákimi Mahambet Dosmuhambetov barlyq deńgeıdegi ákimderge bıýdjetti josparlaǵan kezde halyqtyń barlyq qajettiligin meıilinshe eskerýdi tapsyrdy. Bıýdjettiń tolyq bolýy salyqtardyń jáne ózge de tólemderdiń ýaqytyly túsimine baılanysty. Sondyqtan, bul máselege jaýapkershilikpen qaraýdy júktedi.
