Atyraý oblysynda buzaqylardyń shabýylynan eki shekarashy japa shekti
ATYRAÝ. QazAqparat - Atyraý oblysyndaǵy jaǵalaýǵa jaqyn Jambaı aýylynda shekarada áskerı qyzmetin ótep jatqan eki ásker buzaqylardyń shabýylynan japa shekken, dep habarlaıdy «QazAqparat» HAA tilshisi.
«Oqys oqıǵa shekaralyq zastavaǵa jaqyn mańda merzimdi boryshyn ótep jatqan áskerıler toby áskerı daıyndyq boıynsha komandır orynbasarynyń basshylyǵymen sporttyq júgiristen qaıtyp kele jatqanda bolǵan. Olardy shetel markaly eki mashına qýyp jetip, ishindegiler áskerılerge tóne bastaǵan, atpaqshy bolǵan. Áskerler mashınalardyń shabýylynan jaltaryp qalǵan, biraq eki ásker jeńil dene jaraqatyn alǵan. Ofıtser buzaqylardy kelissózdermen aldandyra otyryp, áskerlerdi zastavaǵa deıin jetkize alǵan. Sodan keıin buzaqylar oǵan shabýyl jasap, urmaqshy bolady. Ofıtser amalsyz úsh ret aspanǵa oq atýǵa májbúr bolǵan, odan eshkim zardap shekpegen», - deıdi Batys garnızonynyń áskerı prokýrory Janbolat Aıekenov.
Prokýrordyń sózine qaraǵanda, oqtyń daýysyna ashynyp, áskerı bólimsheniń aldyna kóptegen jergilikti turǵyndar jınalǵan.
Oqıǵa ornyna Isataı aýdanynyń ákimi, aýdandyq prokýror, AІІB bastyǵy, áskerı polıtsııa qyzmetkerleri jáne áskerı bólim shtabynyń bastyǵy shuǵyl jetip kelgen. Túngi saǵat ekige qaraı barlyǵy tarasqan.
«Qazirgi kezde shekara qyzmetiniń qarýdy paıdalanǵan faktisi esep kitabyna tirkelgen. Qyzmettik tekseris júrgizilýde. Budan tys, buzaqylyq áreket - shekarashylarǵa shabýyl jasaǵan azamattarǵa qatysty Atyraý oblysy, Isataı aýdandyq ishki ister bólimi sotqa deıingi tergeý amaldaryn júrgizýde. Avtomashınalardyń ıeleriniń tulǵasy anyqtalǵan», - deıdi J. Aıekenov.
Atyraý oblysy Isataı aýdanynyń Jambaı aýyly Kaspıı teńiziniń jaǵasynda ornalasqan. Aýyl turǵyndarynyń kópshiligi zańsyz túrde teńizden bekire aýlaýmen aınalysady. Jyl saıyn brakonerlikke qarsy sharalar júrgizetin quqyq qorǵaý organdarynyń ókilderi men aýyl turǵyndary arasynda qaqtyǵystar bolyp turady.
