Atyraý oblysynda bos júrgen 10 718 jastyń úshten biri jumysqa ornalasqan
Atyraý oblysynyń ákimi Serik Shápkenovtiń tóraǵalyǵymen jastar isi jónindegi keńestiń otyrysy ótti. Onda jastardy jumyspen qamtý, kásip bastaǵandardy qoldaý máselesi talqylandy.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, jyl basynan beri jumyspen qamtý ortalyqtaryna 10 718 jas júgingen. Onyń ishinde 3 478 jas jumysqa ornalasqan.
«Memleket tarapynan ulttyq joba sheńberinde jastar úshin «Jastar praktıkasy», «Urpaqtar kelisimsharty», «Alǵashqy jumys orny» jobalary júzege asyp keledi. Onyń ishinde joǵary jáne orta kásiptik oqý oryndaryn aıaqtaǵan jas túlekter úshin «Jastar praktıkasy» jobasyna 1 481 adamdy jumysqa ornalastyrý josparlandy. Al jumys tájirıbesi joq NEET sanatyndaǵy jastarǵa arnalǵan «Alǵashqy jumys orny» jobasyna 271 jas jumyspen qamtylady. Qazir atalǵan joba aıasynda 141 adam jumys isteıdi. Halyqty jumyspen qamtý ortalyqtarynda tirkelgen jumyssyz adamdarǵa arnalǵan «Urpaqtar kelisimsharty» jobasyna 23 adamdy qamtý josparlandy. Bul jobamen 3 adam jumysqa ornalasty», - dep habarlady Azamat Mámbetov.
Eske sala ketelik, buǵan deıin Atyraý oblysynda «kúmis jasqa» jatatyn 343 adam jumysqa ornalastyrylǵanyn habarlaǵan bolatynbyz.
Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetine súıensek, jyl sońyna deıin atalǵan jobamen 600 adamdy jumyspen qamtý kózdelgen.
«Kúmis jas» jobasymen Atyraý qalasynda – 112, Jylyoı men Inder aýdanynda – 46, Qurmanǵazyda – 18, Qyzylqoǵada – 38, Maqatta – 25, Mahambet aýdanynda 29 adam «Kúmis jas» jobasymen jumysqa ornalasty. Olarǵa zeınetaqy tólemi aýdarylady.
