Atyraý oblysynda borandy kúni aýyl turǵyndarynyń 70 sıyry joǵalǵan
ATYRAÝ. QazAqparat – Atyraý oblysynda borandy kúni aýyl turǵyndarynyń 70 sıyry joǵalǵan, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, 23 aqpanda qatty boran saldarynan 70 sıyr joǵalyp ketken.
«Jylyoı aýdanyndaǵy Maıkómgen eldi mekeniniń turǵyndary joǵalǵan 70 sıyrdy ózderi izdegen. Odan eshqandaı nátıje shyqpaǵan soń saqshylardyń kómegine júgingen. Jylyoı aýdany polıtsııa bóliminiń ýchaskelik polıtsııa ınspektory, polıtsııa kapıtany Jaıyq Qoıbasov joǵalǵan maldyń 40-qa jýyǵyn 12 kúnnen soń Maıkómgen aýylynan 180 shaqyrym qashyqtaǵy Mańǵystaý oblysy Qarakıiz taýynyń jıeginen taýyp, ıelerine ákelip tapsyrdy. Aýa-raıynyń qolaısyzdyǵy saldarynan izdeý jumystary birshama qıyndyq týǵyzǵanmen, polıtsııa qyzmetkeri joǵalǵan sıyrlardy izdeýde tabandylyq tanytty. Alaıda, áli de tabylmaǵan 30-ǵa jýyq sıyrdy izdeý jalǵastyrylyp jatyr» -dep habarlady departamenttiń baspasóz qyzmetinen.
Múıizdi iri qarasy tabylǵan turǵyndar polıtsııa qyzmetkerlerdiń qıyn da jaýapty mindetin adal atqaryp, kómek bergeni úshin alǵysyn beınejazba arqyly bildirdi.
Eske sala ketelik, budan buryn Atyraý oblysynda 150 qoıymen birge joǵalyp ketken egde jastaǵy adam tabylǵanyn habarlaǵan edik.
