Atyraý oblysynda bıznesti qoldaý aıasynda 31 ınvestıtsııalyq joba júzege asyrylýda
ATYRAÝ. QazAqparat - Atyraýda oblystyq máslıhattyń HHV sessııasy ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Aımaqtyq máslıhattyń kezekti otyrysynda óńir basshysy Nurlan Noǵaev jıynǵa qatysýshylarǵa Atyraý oblysynyń áleýmettik-ekonomıkalyq damýy týraly aıtyp ótti.
Oblys ákiminiń sózinshe, qazirgi ýaqytta óńirdegi ekonomıkalyq jaǵdaı turaqty, Memleket basshysynyń tapsyrmalary oryndalyp jatyr, sonymen qatar barlyq memlekettik baǵdarlamalar josparǵa saı júzege asyrylýda.
«Kásipkerlik salasy boıynsha, búgingi kúni Atyraý oblysynda 45 906 belsendi shaǵyn jáne orta bıznes sýbektisi tirkeldi. Birinshi toqsannyń qorytyndysy boıynsha, olar jalpy somasy 413,3 mlrd. teńgeniń ónimin óndirdi. Bul ótken jyldyń sáıkes merzimindegi kórsetkishten 38,7% joǵary. Shaǵyn jáne orta bıznes sýbektilerinde birinshi toqsan boıynsha 121,9 myń jumys orny quryldy», - dedi Nurlan Noǵaev.
Budan ózge, Atyraý oblysynda bıznesti qoldaýǵa baǵyttalǵan memlekettik baǵdarlamalar boıynsha jalpy somasy 3,1 trıllıon teńgege 31 ınvestıtsııalyq joba júzege asyrylýda, onda 3635 jumys orny ashyldy.
Aýyl sharýashylyǵynda da jaqsy nátıjelerge qol jetkizildi. Búgingi tańda egis alqabynyń jalpy aýdany 8 616 gektardy quraıdy, tamshylatyp sýarý ádisi 2,540 gektarǵa paıdalanylanýda. Balyqtyń qundy túrlerin saqtaý jáne kóbeıtý úshin balyq ósirý kanaldaryn tereńdetý boıynsha Qıǵash ózeni boıynsha 132 shaqyrym, sondaı-aq Jaıyq ózeniniń 62 shaqyrymynda júzege asyrylýda.
«Oblysta jumyssyzdyq deńgeıi 4,9% quraıdy, bıylǵy jylǵa 27 613 jańa jumys ornyn ashý josparda bolsa, 8 aıdyń kórsetkishi boıynsha 20 182 jańa jumys orny quryldy, onyń ishinde 11 260 oryn turaqty», - dedi óńir basshysy.
Bilim berý salasynda búgingi tańda oblysta 4 mektep apattyq jaǵdaıda, olardyń bireýine jańa ǵımarat salý jumystary bastaldy, al qalǵan úsheýine jobalyq smetalyq qujattar ázirlenýde. Atyraý oblysynda qazirgi tańda úsh aýysymmen oqıtyn 14 mektep bar. Bul máseleni sheshý úshin 14 jańa mekteptiń qurylysy bastaldy, taǵy 8 mektep memlekettik-jekemenshik áriptestik qaǵıdaty boıynsha salynatyn bolady. Jańa oqý oryndarynyń iske qosylýy mektepterdegi oqýshylardyń shekten tys bolý máselesin sheshýge múmkindik beredi.
«Balabaqshalar boıynsha mektep jasyna deıingi balalardy qamtý 95% quraıdy, Memleket basshysynyń tapsyrmasy boıynsha bul kórsetkishti 100% - ǵa deıin arttyrý josparlanýda. Jergilikti bıýdjet qarajaty esebinen jáne aımaqtaǵy jer qoınaýyn paıdalanýshylar áleýmettik aýdarymdardyń esebinen balabaqshalar men mektepke deıingi mekemeler salynady. Máselen, óńirdegi MJÁ qaǵıdasyna sáıkes, 20 jańa balabaqsha salý josparlanýda», - dep málimdedi oblys ákimi.
Oblysta bala men ana óliminiń, týberkýlezdiń jáne onkologııalyq aýrýlardyń tómendeýi baıqalady. Medıtsınalyq nysandar qazir 100% ınternetke tolyq qosylǵan kompıýterlik tehnıkamen jabdyqtalǵan, qyzmetterdiń kópshiligi elektrondy formatta usynylǵan.
Búgingi kúni óńirde MJÁ negizinde eki mańyzdy joba iske asyrylýda - kóshelerdi jaryqtandyrýdy jańǵyrtý, sondaı-aq aýyl turǵyndaryna rentgenografııa qyzmetterin kórsetý. Qazirgi ýaqytta Atyraý qalasy men onyń mańyndaǵy aýdandarda jalpy uzyndyǵy 106 km bolatyn 39 kóshe jaryqtandyryldy. Qazir MJÁ sheńberinde aımaqtaǵy taǵy 194 kósheni qamtıtyn kóshe jaryqtaryn ornatýǵa kelissózder júrgizilýde.
«Jer qatynastary salasynda búgingi tańda 500 myń gektar jer memlekettik menshikke qaıtaryldy, jaqyn arada aýktsıondarda jer telimderi shyǵatyn bolady. Jeke turǵyn-úı qurylysyna bólingen 400 ýchaskege barlyq qajetti ınfraqurylymdar júrgizilýde. Budan basqa taǵy 3500 jer ýchaskesine ınjenerlik kommýnıkatsııalar júrgizilýde», - dedi Nurlan Noǵaev.
Búgingi kúni qoǵamdyq qaýipsizdik salasynda oblys ortalyǵyna kire beriste 4 statsıonarlyq polıtsııa beketiniń qurylysy aıaqtalyp, qala mańyndaǵy aýdandarda 20 polıtsııa ýchaskesi salynýda.
