Atyraý oblysynda bızneske 29 mln teńge grant bólindi
ATYRAÝ. QazAqparat - 2017 jyly «Bıznestiń jol kartasy - 2020» baǵdarlamasy boıynsha Atyraý oblysyna memlekettik grantqa 29 mln teńge bólindi, dep habarlady QazAqparat óńirlik kommýnıkatsııalar qyzmetine silteme jasap.
«Kásipkerlik jáne ındýstrııaldy-ınnovatsııalyq damý basqarmasy bıznesti damytýǵa memlekettik grant alýǵa baıqaýǵa qatysý úshin kásipkerlerden 59 ótinim qabyldady. Osy jylǵy mamyrda birinshi transh boıynsha 15,7 mln teńge ıgerildi. Baıqaýǵa 45 kásipker qatysty, onyń nátıjesi boıynsha konkýrstyq komıssııa jáne Óńirlik úılestirý keńesiniń sheshimimen 8 jeńimpaz irikteldi. Memlekettik granttyń arqasynda bıznesin damytý úshin oblys aýdandarynan - 7, Atyraýdan 1 kásipker qoldaý aldy», - dep habarlandy óńirlik kommýnıkatsııalar qyzmetinde.
Maýsymda ekinshi transh boıynsha memlekettik grant úshin 14 kásipker talasty, konkýrs nátıjesi boıynsha 7 joba maquldandy, osylaısha, 13,3 mln teńge ıgerildi. Maquldanǵan bıznes jobalardyń ishinde 3-ýi aýdan, 4-ýi Atyraý kásipkerlerine tıesili.
Atyraý oblysynda «Bıznestiń jol kartasy - 2020» baǵdarlamasyn sátti iske asyrý aıasynda óńir úshin mańyzdy jobalar iske qosylady. Atap aıtqanda, múmkindigi shekteýli balalardy damytý ortalyǵy, aıaq kıim óndirý tsehy, jartylaı fabrıkattar óndirý, qoqystardy qaıta óńdeý tsehy jáne t.b. Kelesi óteýsiz granttar berýge ótinim qabyldaý 2018 jyly bastalady.
