Atyraý oblysynda bıylǵy on aıda 418 sábı shala týǵan
Oblystyq densaýlyq saqtaý basqarmasy basshysynyń orynbasary Janar Sádýovanyń málimetine súıensek, bıylǵy 10 aıda 8 131 bala dúnıege kelgen.
«Qazir oblystyq perınataldyq ortalyqtyń jansaqtaý bóliminde salmaǵy óte tómen 15 sábı dárigerlerdiń baqylaýyna alyndy. Bıylǵy on aıda 418 sábı merziminen buryn ómirge keldi. Shala týǵandardyń eń jeńil salmaǵy – 500 gramnan 1 kelige deıin aralyqty qurap otyr. Byltyr shala týǵan nárestelerdiń ómir súrý deńgeıi 20%-ǵa, bıyl 33%-ǵa artty. Mundaı oń kórsetkishke dárigerlerdiń neonatologııalyq biliktiligin arttyrý, kıývezder men ókpeni jasandy jeldetý apparattaryn, tynys alýdy qalypty ustap turatyn SIPAP-qondyrǵylardy satyp alý arqyly qol jetkizdik» -deıdi Janar Sádýova.
Onyń aıtýynsha, júkti analardyń merziminen buryn bosanýyna áser etetin birneshe sebep bar. Birinshiden, júktilik arasyndaǵy aralyq saqtalmaıdy. Ekinshiden, analar júkti bolǵannan keıin dárigerge qaralýdy sozyp alady. Úshinshiden, júktilikti aldyn ala josparlamaıdy.
Eske sala ketelik, buǵan deıin Atyraýda saılaý kúni tuske deıin 23 sábı ómirge kelgenin jazǵan edik.
