Atyraý oblysynda bıylǵy bes aıda 5 adam sýǵa batyp ketken
Oblystyq tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Asqat Erjanovtyń málimetinshe, bıyl Atyraý qalasynda 28 jaǵajaıda shomylýǵa tyıym salynyp otyr.
«Bıyl sýǵa shomylý maýsymy áli bastalmaǵanyna qaramastan, 5 aı ishinde sý aıdyndarynda 5 adam batyp ketti. Onyń ishinde 1 bala bar. Ótken jyly oblystaǵy sý aıdyndarynda 28 adam ajal qushty. Ókinishke oraı kóz jumǵandardyń arasynda 10 bala bar. El aýmaǵynda 1 maýsymda sýǵa shomylý maýsymy ashyldy. Alaıda, Atyraý qalasyndaǵy jaǵajaılar sýǵa shomylý maýsymyna daıyn emes. Qazir tótenshe jaǵdaılar mamandary sýǵa túsýge ruqsat etilgen achaskelerdi tekserip, sý túbin qoqystar men artyq zattardan tazartyp jatyr», -deıdi Asqat Erjanov.
Onyń aıtýynsha, Atyraý qalasynda, Jylyoı jáne Qurmanǵazy aýdanyndaǵy sýdan qutqarý stantsııalarynda ornalasqan úsh jedel-qutqarý jasaǵy qyzmetkerleriniń táýlik boıy kezekshiligi josparlanyp otyr.
«Atyraý qalasynyń aýmaǵynda 28 jaǵajaıǵa sýǵa túsýge tyıym salyndy. Mundaı jaǵajaılar Jumysker, Qyzylbalyq, Damby, Talǵaıran, Geolog, Tomarly, Aqsaı, Aqjar aýyldary, Peretaska, Erkinqala, Qaraózek, Bereke eldi mekenderinde, Balyqshy shaǵyn aýdanyndaǵy stadıon tusynda, Beıbarys kóshesi arqyly ótetin kópir mańyndaǵy eski parom, Kókarna aýylynyńdaǵy 5-ótkelinde, Rembaza, Avangard shaǵyn aýdandarynda, B.Nysanbaev, M.Halelov, Ó.Atambaev, Temirhanov kóshelerinde, «Kottedjnyı qalashyǵy» men Sokolınsk kanalynda ornalasqan», -dep málim etti Asqat Erjanov.
Eske sala ketelik, buǵan deıin Atyraýda 2gis qosymshasyna sýǵa túsýge tyıym salynǵan aýmaqtar engizilgenin habarlaǵan bolatynbyz.