Atyraý oblysynda bıylǵy 8 aıda 270 adam týberkýlez dertin juqtyrǵan
Atyraý oblystyq sanıtarııalyq-epıdemıologııalyq baqylaý departamentiniń bas mamany Zýlfııa Qaıredenovanyń málimetinshe, bıylǵy 8 aıda týberkýlezge shaldyqqandar sany 9,8%-ǵa tómendegen.
«Jyl basynan bergi 8 aıda Atyraý oblysynda týberkýlezben jańadan aýyrǵan 271 naýqas tirkeldi. Qurt aýrýyn juqtyrǵandar sany ótken jyldyń osy kezeńimen salystyrǵanda 9,8%-ǵa azaıǵan. Al, balalar arasynda týberkýlezben aýyrǵandar 7 jaǵdaıǵa kóbeıdi. Qazir jasóspirimder arasynda 21 naýqas anyqtalyp otyr. Týberkýlez taıaqshalary qaqyryqty mıkroskopııalyq tekserý arqyly anyqtaldy. Bul – týberkýlezdi anyqtaýdyń eń senimdi, ári tıimdi tásili. Al mantý synamasy balalarda týberkýlez taıaqshalarymen zaqymdalýdy der kezinde anyqtaý úshin qoldanylady. Mantý – ekpe emes, qaýipsiz dıagnostıkalyq test», -deıdi ZýlfııaQaıredenova.
Onyń aıtýyna qaraǵanda, týberkýlez aýrýy bastalǵanda jótel, álsizdik, dene qyzýynyń kóterilýi, keýde tusynyń aýrýy, tábettiń, salmaqtyń, jumysqa qabilettiń tómendeýi baıqalady. Bul belgilerdiń bári odan ári údeı tússe, naýqas qan túkirýi múmkin.
«Jótel – týberkýlezge tán eń alǵashqy belgilerdiń biri. Eger naýqasta jótel eki aptadan uzaqqa sozylsa, mindetti túrde dárigerge qaralyp, týberkýlez aýrýyna tekserilgen jón», -deıdi Zýlfııa Qaıredenova.
Eske sala ketelik, buǵan deıin Atyraýda týberkýlez juqtyrý azaıyp, koronavırýsqa shaldyǵý 4 ese óskenin habarlaǵan edik.