Atyraý oblysynda bıylǵy 10 aıda qylmys kórsetkishi 6 paıyzǵa ósken
Bul týraly Atyraý oblysynyń prokýrory Baýyrjan Jumaqanovtyń tóraǵalyǵymen ótken zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda aıtyldy.
Prokýratýranyń málimetine súıensek, byltyrǵy kórsetkishpen salystyrǵanda, bıylǵy 10 aıda tirkelgen qylmystyń sany 6%-ǵa óskeni anyqtalyp otyr. Onyń ishinde adam óltirýge oqtalý 3-ten 6-ǵa (100%), urlyq 1 081-den 1 387-ge (28%), jol-kólik oqıǵalary 163-ten 181-ge (11%), qasaqana densaýlyqqa aýyr zııan keltirý 37-den 41-ge (11%) deıin ósken.
«Elimizdiń eń qymbat qazynasy – adam jáne onyń ómiri, quqyqtary men bostandyqtary. Árkimniń qaýipsiz ári laıyqty ómir súrýge quqyǵy bar. Eshkimniń adam ómirin qııýǵa haqysy joq. Bul Konstıtýtsııamen bekitilgen», -dedi Baýyrjan Jumaqanov.
Onyń aıtýynsha, quqyq qorǵaý organdarynyń jumysy qylmystyń aldyn alýǵa baǵyttalýy kerek. Osyǵan baılanysty eń utymdy retinde jol qylmystyq protsestiń úsh býyndy modelin iske asyrýǵa den qoıǵan jón.
«Qylmystyq isterdi tergeý kezinde áýre-sarsańǵa jol berilmeýi tıis. Óıtkeni, bul qylmystyq protsesti júrgizetin organnyń bedeli men ımıdjine tikeleı áser etedi. Sol sebepten, kisi óltirýge qatysty qylmystyq isterdi, jol-kólik oqıǵasy kezinde jáne óndiriste dene jaraqatyn alý, adamdardyń qaıtys bolý deregi boıynsha isterdi sapaly ári jedel tergep-tekserýdi qamtamasyz etý qajet», -dep málim etti Baýyrjan Jumaqanov.
Eske sala ketelik, buǵan deıin Atyraý oblysynyń polıtseıleri izdeýde júrgen 80 qylmyskerdi ustaǵanyn jazǵan edik.