Atyraý oblysynda bıyl 60 gıdrogeologııalyq uńǵyma joıylady
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Nurlan Jantoqovtyń aıtýynsha, Jylyoı aýdanynyń aýmaǵyndaǵy 60 gıdrogeologııalyq uńǵymany joıý kózdelip otyr.
«Ózdiginen aǵatyn gıdrogeologııalyq uńǵymalar jer astyndaǵy tuşy sýdyń tabıǵı resýrsyna, qorshaǵan ortaǵa zııan keltiredi. Jerasty jáne jerústi sýlaryn fenoldarmen, radıoaktıvti jáne ýly elementtermen lastaıdy. Osyǵan baılanysty byltyr Jylyoı aýdanyndaǵy 60 gıdrogeologııalyq uńǵymany joıý úshin jobalyq-smetalyq qujattama jasaqtaý úshin respýblıkalyq bıýdjetten 26,5 mln teńge qarjy bólindi. Al, bıyl ıesiz qalǵan uńǵymalardy tyǵyndaý, jabý jumystaryn júrgizýge Qarjy mınıstrligine respýblıkalyq bıýdjetten 465 mln teńge qarjy bólýge ótinim joldandy», -deıdi Nurlan Jantoqov.
Onyń aıtýynsha, Jylyoı aýdanynyń aýmaǵyndaǵy gıdrogeologııalyq uńǵymalardy joıý ózekti máselege aınalǵan.
«Óıtkeni, bul jaǵdaı jerasty sýlarynyń halyq ıgiligine paıdalanylmaı, bosqa aǵyp ketýine, kóleminiń azaıýyna ákelip soǵýy múmkin. Onyń ústine atalǵan aýdanda sý kózderiniń tapshylyǵy baıqalady. Osyǵan baılanysty jerasty sý kózderin tıimdi paıdalaný máselesin sheshý qajettigi týyndap otyr. Jalpy, Atyraý oblysyn áleýmettik-ekonomıkalyq damytýdyń 2021-2025 jyldarǵa arnalǵan keshendi josparyna ekologııalyq máseleler boıynsha 22 is-shara engizildi», -deıdi Nurlan Jantoqov.
Eske sala ketelik, buǵan deıin Atyraý oblysynda paıdalanylmaǵan 21 myń gektardan astam jer keri qaıtarylǵanyn jazǵan edik.