Atyraý oblysynda bıyl 232 tegin grant bólindi
ATYRAÝ. QazAqparat - Atyraýda joǵarǵy bilim alý úshin jergilikti bıýdjet qarajaty esebinen bıylǵy jyly 232 grant bólindi, dep habarlaıdy QazAqparat tilshisi.
Bilim basqarmasynyń málimetinshe, granttar jergilikti bıýdjet qarajaty esebinen kadrlardyń
qajettilikterin eskere otyryp, naqty mamandyqtar boıynsha oblystyń joǵary oqý
oryndarynda konkýrstyq negizde taǵaıyndalady. Bıyl granttar bilim berý,
densaýlyq saqtaý, veterınarııa, balyq sharýashylyǵy, dintaný, memlekettik aýdıt,
aqparattyq tehnologııalar jáne t.b. salalarǵa bólinýde.
Aıta keteıik, 2017 jyly Atyraý oblysynda stýdentter alǵash ret joǵary oqý
oryndarynda jergilikti bıýdjet esebinen bilim alýǵa múmkindik aldy. Barlyǵy 222
bilim granty bólindi. Olardyń ishinde 178 oqytýshy, 35 dáriger jáne 9
veterınarlyq mamandyq boıynsha stýdentter. Bilim granttarynyń ıegerleri Atyraý,
Batys Qazaqstan jáne Aqtóbe oblystarynyń joǵary oqý oryndarynda taǵylymdamadan
ótti.
2018 jyly 230 bolashaq jas maman jergilikti bıýdjet esebinen joǵary oqý oryndarynda oqýǵa múmkindik aldy. Olardyń ishinde 149 - pedagogıkalyq mamandyq boıynsha, 56 - medıtsınalyq, 9 - aýylsharýashylyq salasynda, 2 - jeńil ónerkásip ónimderi men tehnologııalary, 14 - avtomatıka jáne basqarý mamandyǵyn oqydy.
Sonymen qatar, 16
stýdent «Aımaqtyq ekonomıkany damytý baǵdarlamasy» jáne «Jer paıdalanýdy
basqarý» baǵdarlamalary boıynsha magıstrlerdi daıarlaý úshin bilim grantynyń
ıegeri atandy.
Sondaı-aq, bıyl QR Úkimeti 2019-2020 oqý jylyna kópbalaly otbasylardyń balalary
men ataýly áleýmettik kómek alýshylar úshin 220 qosymsha bilim berý grantyn bóldi.
Bilim berý grantyn berýdi jergilikti atqarýshy organdar «bakalavr» nemese
«magıstr» ǵylymı dárejesin bere otyryp, joǵary nemese joǵary oqý ornynan
keıingi bilim úshin aqy tóleý úshin bilim berý grantyn berý erejesine sáıkes
júzege asyrady.
Konkýrsqa ótinishti 5 jáne 10 tamyz
aralyǵynda H. Dosmuhamedov atyndaǵy Atyraý memlekettik ýnıversıtetinde qabyldaıdy.
