Atyraý oblysynda bıyl 1,5 mln kóshet egiledi
Atyraý oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurlan Jantoqovtyń málimetinshe, 2021-2025 jyldary aralyǵynda 7 mln kóshet egý kózdelgen.
«El Prezıdenti Qasym-Jomart Toqaevtyń Qazaqstan halqyna arnaǵan Joldaýynda 2021-2025 jyldary orman alqabynda 2 mlrd tal egý jóninde berilgen tapsyrmasy bar. Osy tapsyrmany júzege asyrý úshin Atyraý oblysynda ormandardy ósirý men molaıtýǵa arnalǵan keshendik jospary bekitildi. Jospar boıynsha bes jylda 2803 gektar orman alqabyna barlyǵy 7 mln kóshet egý kózdelgen. Bul baǵyttaǵy jumystarǵa jergilikti bıýdjetten 805 mln 400 myń teńge bólý josparlandy», -deıdi Nurlan Jantoqov.
Onyń aıtýynsha, 2021 jyly oblystyq bıýdjetten 214 mln teńge qarajat bólingen.
Bul qardy orman sharýashylyǵy mekemelerine tehnıka alýǵa, tuqym jınaý, óńdeý, saqtaý, qorshaý jumystaryn júrgizýge, maýsymdyq jumysqa qosymsha tartylǵan jumysshylardyń eńbek aqysyn tóleýge jumsalǵan.
«Sol jyly oblystaǵy orman qorynyń 309 gektar alqabyna 905 myń kóshet egildi. Al byltyrǵy jyly orman qoryndaǵy 543,5 gektarǵa 1 mln 389 myń kóshet egý jospary tolyǵymen oryndaldy. Bul baǵyttaǵy jumystarǵa oblystyq bıýdjetten 253,1 mln bólinip, tıisti jumystarǵa jumsaldy. Bes jyldyq josparǵa sáıkes osy jyly 573,5 gektar jerge 1 mln 439 myń kóshet egý josparlanyp otyr. Onyń ishinde qaraǵash, úıeńki, shaǵan, qara tal, ırga, sekseýil, tamarıks kóshetteri bar. Qazir daıyndyq jumystary júrgizilip jatyr», -dep málim etti Nurlan Jantoqov.
Eske sala ketelik, buǵan deıin Atyraý oblysynda 55 qoqys polıgony baryn habarlaǵan edik.
