Atyraý oblysynda birrettik shprıtster halyqqa tegin taratylýda
ATYRAÝ. QazAqparat –Atyraý oblysynda turǵyndarǵa birrettik shprıtster tegin taratylýda, dep habarlaıdy QazAqparat.
«Jalpy sany 2 mln dana shprıtsti tegin beremiz. Al, 500 myń danasyn erteńnen bastap taratamyz. Qyzylqoǵa aýdanynda ár adamǵa 10 danadan, barlyǵy 300 myń dana beremiz. Qoldan kelgeni osy», - dep jazdy «Brando» JShS-niń quryltaıshysy Mahmýt Meralıev áleýmettik jelidegi paraqshasynda.
Kásipker buǵan deıin Qyzylqoǵa aýdandyq aýrýhanasyna 1 mln 345 myń teńgeniń dári-dármegin, 1 mln teńgeniń ottegi ballonyn alyp bergen. Sondaı-aq, aýrýhanadaǵy 10 patsıenttiń árqaısysyna materıaldyq kómek kórsetken.
Búgin, 1 shildede kásipker usynǵan birrettik 500 myń shprıtsti volonterler Atyraý qalasynyń turǵyndaryna tegin taratty. Bir adamǵa –15 dana shprıtsten. Endi olar qala mańyndaǵy 7 aýyldyq okrýg turǵyndaryna da tegin taratýdy kózdep otyr.
Eske sala ketelik, buǵan deıin Atyraýda kásipkerler oblystyq aýrýhanaǵa 2 jasandy tynys aldyrý apparatyn syılady.
«Brando» JShS shprıtster óndirisimen aınalysady.
