Atyraý oblysynda bir jyl buryn salynǵan 36 shaqyrym jol qaıta jóndeledi
«Jol aktıvteri sapasynyń ulttyq ortalyǵy» RMK Atyraý oblystyq fılıalynyń bólim basshysy Nurlan Jantýrınniń aıtýynsha, «Aqtóbe-Atyraý-RF shekarasy» baǵytyndaǵy jolda anyqtalǵan aqaý merdiger mekemeniń qarjysyna qaıta jóndeledi.
«Óńirlik fılıal ınjenerleri sáýir aıyndaǵy josparly tekseris kezinde atalǵan joldyń «Atyraý-Dossor» bóligindegi 120 500 sharshy metrden qara qıyrshyqtastyń ushqanyn anyqtaǵan edi. Qazir joldyń bul bóligi kepildik merziminde tur. Alaıda merdiger aýa raıy qolaıly kezde aqaýlardy tolyǵymen joıý jumysyn ýaqytynda bastamaǵan. Sol sebepten tapsyrys berýshi «QazAvtoJol» AQ Atyraý oblysy boıynsha fılıalyna jáne oblystyq memlekettik Sáýlet-qurylys baqylaý basqarmasyna hat joldandy», - deıdi Nurlan Jantýrın.
Onyń aıtýynsha, 553-589 shaqyrym aralyǵyndaǵy jolǵa 2021 jyly qyrkúıekte ortasha jóndeý bastalyp, 2022 jyldyń jeltoqsan aıynda tapsyrylǵan. Keshe atalǵan jol bóliginiń betki qabatyn qaıta tóseý jumystary bastalǵan. Aqaýdy joıý jumystary Mańǵystaý qurylys kombınaty» AQ-nyń qarajysyna jasalady.
«Bul joldyń eki jyl kepildik merzimi bar. «Jol aktıvteriniń ulttyq sapa ortalyǵy» RMK fılıaly tekserý kezinde aqaýdy anyqtady. Kemshilikterdi joıý úshin Mańǵystaýdan kelip, jumysqa kiristik. Qazir jol ústindegi tańbalardy qyryp, tazalaý jumystary júrip jatyr. Sodan soń 12 shaqyrymǵa túgeldeı jáne keı tustaryna qajetti kólemine qaraı qara qıyrshyqtas tóseledi. Jumysty 2 aptada aıaqtaımyz. Keshigip bastaýymyzdyń sebebi – kórshi oblystan keldik, tehnıkamyz bos bolmady. Jol jóndeýge 1 500 tonnadaı qıyrshyqtas jumsalady», - deıdi ýchaske bastyǵy Naýryz Súıinǵara.
Eske sala ketelik, budan buryn Atyraýdan Reseımen shekaraǵa deıingi joldy jóndeýge 18 mlrd teńge bólingenin jazǵan edik.
