Atyraý oblysynda bir jyl buryn kisi óltirgen 8 adamǵa sot úkimi shyqty
Atyraý oblysynyń qylmystyq ister jónindegi mamandandyrylǵan aýdanaralyq sotynda adamdar tobynyń aldyn ala sóz baılasýymen jábirlenýshini qasaqana qazaǵa ushyratqany úshin aıyptalǵan 8 sottalýshyǵa qatysty qylmystyq is qaraldy.
Kúdiktilerge QR Qylmystyq kodeksiniń 99-babynyń 2-bóliginiń 7-tarmaǵymen aıyp taǵylǵan.
«2021 jyldyń 6 tamyzynda Inder aýdanynda K. sottalýshy A-ny uryp-soǵyp, oǵan dene jaraqatyn keltirgen. Bul týraly sottalýshy A-nyń dostary T., H., B. jáne Ý. estip, 8 tamyzda qaladan aýylǵa kelgen. Saǵat 13:00 shamasynda sottalýshylar A., O. jáne kýálar M., I. jábirlenýshi K-nyń úıine kelip, oǵan A-men sóılesý úshin aýyl syrtyna shyǵýdy usynǵan. Basqa adamdar jóninde bilmegen jábirlenýshi K. sóılesýge shyqqanda T., Ǵ., H., B., Á., Ý. bulardy syrtynan tyǵylyp baqylap, oqıǵa ornyna kelgen. Jábirlenýshi A-men sóılesip turǵan kezde basqa adamdardyń kelgenin, T-nyń kólikten turbamen shyqqanyn kórip, dereý qasha jónelgen. Bári jábirlenýshiniń sońynan qýǵanda, Ǵ. birinshi bolyp jetip, ony shalyp qulatqan. Sol kezde sottalýshylar T., Ǵ., O., Á., A., B., Ý., H. jábirlenýshi K-ni uryp-soǵyp, teýip, oǵan aýyr, orta, jeńil dárejedegi dene jaraqatyn keltirgen. T. temir turbamen onyń basynan, betinen, aıaq-qolynan birneshe ret uryp-soqqan. Olar jábirlenýshini aýyr dene jaraqatymen oqıǵa ornynda tastap ketken. Sol kúni jábirlenýshi K. aýrýhanaǵa barar jolda qaıtys bolǵan»,-dep habarlady sottyń baspasóz qyzmeti.
Sotta sottalýshylardyń kinási jábirlenýshilerdiń, kýálardyń, sottalýshylardyń aıǵaqtarymen, oqıǵa bolǵan jerdi qaraý hattamasymen, saraptama qorytyndysymen, zattaı dáleldemelermen dálelin tapty.
Prokýror sottalýshy T-ny 17 jyl, sottalýshy O-ny 16 jyl, ózgelerin 15 jyl merzimge bas bostandyǵynan aıyrý jazasyn taǵaıyndaýdy surady.
Sottalýshylar kinásin ishinara moıyndady. Qorǵaýshy tarap sottalýshylardyń is-áreketin jeńil sanattaǵy qylmys úshin qaıta dárejeleýdi surady.
Sottalýshylar A., B, Á., H., Ý-dyń is-áreketi Qylmystyq kodekstiń 106-babynyń 2-bóliginiń 5-tarmaǵymen qaıta dárejelendi.
Sot sottalýshy O-nyń alkogoldi mas bolyp qylmys jasaǵanyn jazany aýyrlatatyn jaǵdaı dep tanydy. Jazany jeńildetetin mán-jaı retinde sottalýshylardyń kinásin ishinara moıyndaýy, Ǵ., Á. men Ý-dyń jasóspirim balalary bar ekeni eskerildi.
«Sot úkimimen T., Ǵ., O. QR Qylmys kodeksiniń 99-babynyń 2-bóliginiń 7-tarmaǵymen kináli dep tanylyp, olarǵa 15 jyl merzimge bas bostandyǵynan aıyrý jazasy taǵaıyndaldy. Al, A., B., Á., H., Ý. 106-baptyń 2-bóliginiń 5-tarmaǵymen kináli dep tanylyp, 6 jyl bas bostandyǵynan aıyrý jazasyna sottaldy. Sottalýshylardan jábirlenýshi taraptyń paıdasyna 37 000 000 teńge mólsherinde moraldyq zııan úshin ótemaqy óndirildi», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, buǵan deıin Atyraýda úsh adamdy atyp óltirip, taǵy bireýin jaraqattaǵan jigittiń isi sotqa jetkenin jazǵan edik.