Atyraý oblysynda bir mezette tórt páter otqa orandy

ATYRAÝ. QazAqparat – Atyraý oblysynda bir mezette turǵyn úıdiń tórt páteri órtendi. Jalyn ortasynan 8 adam, onyń ishinde 5 bala evakýatsııalandy, dep habarlaıdy QazAqparat tilshisi.

Órt Maqat aýdanyndaǵy Dossor kentinde búgin jergilikti ýaqytpen saǵat 07:00 shamasynda boldy. Bul týraly «102» operatoryna habar túsken.

«Maqat aýdanynyń ortalyǵynan 30 shaqyrym qashyqta ornalasqan Dossor kentindegi 6 páterlik turǵyn úıde órt tutandy. Aýdandyq polıtsııa bóliminiń qyzmetkerleri úıden turǵyndardy evakýatsııalap, órt sóndirýshilermen birge tilsiz jaýdy sóndirýge atsalysty. Jalynnyń ortasynan 8 adam, onyń ishinde 5 bala qaýipsiz jerge shyǵaryldy», - dep habarlady oblystyq Polıtsııa departamentiniń baspasóz qyzmetinen.

Belgili bolǵandaı, Dossor kentindegi 6 páterlik turǵyn úıdiń 4 páteri bir mezette otqa oranǵan.

«Órt neden shyqqany keıin naqtylanatyn shyǵar. Eń bastysy, ot sharpyǵan páterlerdiń turǵyndaryn shyǵarýǵa tyrystyq. Zardap shekkender joq. Jalyn órship ketpeýi úshin órt sóndirýshilerge kómektestik. Mundaıda órtengen turǵyn úıdiń aýmaǵyna bógde adamdardyń barýyna tosqaýyl qoıylýy kerek», - deıdi Maqat aýdandyq polıtsııa bólimi Dossor polıtsııa bólimshesiniń bastyǵy Dáýren Maǵzomov.

Aıta keteıik, D.Maǵzomovpen birge turǵyndardy evakýatsııalaýǵa patrýldik polıtsııa qyzmetiniń ınspektory Jantilek Elǵondıev kómektesken.