Atyraý oblysynda bir kún buryn iz-túzsiz joǵalyp ketken malshy tabylmaı jatyr
Atyraý oblystyq tótenshe jaǵdaılar departamentiniń baspasóz qyzmetinen málim etkendeı, 53 jastaǵy er adam keshe, 15 aqpanda tańerteń óriske mal aıdap shyqqan.
«Keshe jergilikti ýaqytpen saǵat 09:00 shamasynda Inder aýdanynyń Órlik aýylynan 30 shaqyrym qashyqtyqtaǵy «Amanǵalı» qystaǵynan 1970 jylǵy er adam túıemen mal baǵýǵa shyǵyp, qaıta oralmaǵan. Malshydan búginge deıin esh habar bolmaǵan. Búgin malshynyń iz-túzsiz joǵalǵany týraly aqparat saǵat 09:00 shamasynda tústi», -dep habarlady departamenttiń baspasóz qyzmeti.
Bir kún buryn iz-túzsiz joǵalǵan malshyny izdeýge Atyraý oblystyq tótenshe jaǵdaılar departamentiniń 4 qyzmetkeri men 1 tehnıka tartyldy. Іzdestirý jumystaryna joǵalǵan adamnyń týystary men jergilikti turǵyndar da qosyldy.
«Atyraý oblysynyń aýmaǵynda aqpan aıynyń basynan beri kún buzylyp, qalyń qar tústi. Osyǵan baılanysty turǵyndardyń alys jolǵa shyqpaǵany jón. Aýa raıy týraly 112 qyzmeti jiberetin sms habarlardy eskerý qajet», -dep málim departamenttiń baspasóz qyzmeti.
Eske sala ketelik, buǵan deıin Atyraý oblysynda 1 qańtarda joǵalǵan er adam kórshi aýyldan tabylǵanyn jazǵan edik.
Keıin Atyraý oblysynda joǵalyp ketken úsh adam bir kúnnen keıin tabylǵanyn habarlaǵan bolatynbyz.
Foto: Atyraý oblystyq TJD baspasóz qyzmeti