Atyraý oblysynda bir qabatty ǵımarattaǵy sýpermarket pen ashana órtendi
ATYRAÝ. QazAqparat – Atyraý oblysynda bir qabatty ǵımarattaǵy sýpermarket pen ashana órtendi, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń aqparatyna qaraǵanda, órt búgin, 30 qyrkúıekte Qurmanǵazy aýdanynda tutanǵan.
«Túngi saǵat 00:35 mınýt shamasynda Orly aýylynda ornalasqan bir qabatty sýpermarket ǵımaraty órtendi. Qurmanǵazy aýdanyndaǵy №7 órt sóndirý bóliminiń órt sóndirýshileri oqıǵa ornyna jetkende «Bısenov» jeke kásipkerligine qarasty jalpy aýdany 1000 sharshy metr bolatyn bir qabatty ǵımarattyń tóbe jabyndysy janyp jatqanyn anyqtady. Jalynnyń saldarynan ǵımarattaǵy «Quralaı» sýpermarketi men ashana tolyqtaı janyp ketti. Ǵımarat 2009 jyly salynǵan. Qabyrǵalary kirpishten qalanǵan, tóbe jabyndysy aǵashtan, qamystan jasalǵan, shatyry temir proflıstpen qaptalǵan» -dep habarlady departamenttiń baspasóz qyzmeti.
Jalyndy sóndirýge №7 órt sóndirý bóliminen 17 qyzmetker men 2 tehnıka jumyldyryldy. Órt saǵat 02:54-te oqshaýlanyp, saǵat 04:00-de tolyqtaı joıyldy. Zardap shekkender men qaza bolǵandar joq.
Eske sala ketelik, budan buryn Atyraýda eki qabatty mansardty úı órtenip ketkenin habarlaǵan edik.
