Atyraý oblysynda bir qabatty bazar órtendi
Oblystyq tótenshe jaǵdaılar departamentiniń qoǵammen aılanys tobynan málim etkendeı, órt týraly búgin, 21 qazanda saǵat 07:24-te habar túsken.
«Qurmanǵazy aýdandyq №7 órt sóndirý bóliminiń baılanys beketine Qurmanǵazy aýylynyń Abaı kóshesindegi bir qabatty «Serper» bazary ǵımaratynan órt shyqqany týraly habar tústi. Shaqyrtý ornyna órt sóndirý bóliminiń qyzmetkerleri jetken kezde azyq-túlik pen kıim-keshek satýǵa arnalǵan saýda sóreleriniń janyp jatqany anyqtaldy. Órt saldarynan halyq tutynatyn taýarlary bar saýda sóreleriniń, saýda sóreleriniń janýy oryn aldy. Bazar ǵımaratynyń jalpy aýdany – 600 sharshy metr. Onyń 200 sharshy metrin jalyn sharpydy», -dep habarlady departamenttiń qoǵammen baılanys toby.
Jalyn jergilikti ýaqytpen saǵat 08:44-te oqshaýlanyp, saǵat 09:15-te sóndirildi.
Órtti sóndirýge Qurmanǵazy aýdandyq №7 órt sóndirý bóliminiń 20 qyzmetkeri men 3 tehnıkasy jumyldyryldy.
Bazardaǵy órtten zardap shekkender men qaza tapqandar joq. Jalynnyń tutaný sebebi anyqtalyp jatyr.
«Adam ómirine qaýip tóndiretin tabıǵı tehnogendik apattar qataryna órt te jatady. Sol sebepten, Atyraý oblysynyń turǵyndary men qonaqtarynan órt qaýipsizdigi erejelerin qatań saqtaýdy suraımyz», -dep málim etti qoǵammen baılanys tobynan.
Eske sala ketelik, budan buryn Atyraý oblysynda KamAZ ben 840 tonna mal azyǵy órtenip ketkenin jazǵan edik.
