Atyraý oblysynda bir aptada jol erejesi 3 790 márte buzylǵan
ATYRAÝ. QazAqparat – Atyraý oblysynda bir aptada jol erejesin buzýdyń 3 790 deregi tirkeldi, dep habarlaıdy QazAqparat.
Oblystyq polıtsııa departamenti baspasóz qyzmettiniń málimetinshe, 8 qarashadan beri «Qaýipsiz jol» jedel-profılaktıkalyq is-sharasy ótip jatyr.
Іs-sharanyń maqsaty – jol-kólik oqıǵalaryn boldyrmaý, sondaı-aq, jol júrisi qaǵıdalaryn buzýdyń aldyn alý.
Polıtsııa qyzmetkerleri bir aptada jolda júrý erejesin buzýdyń 3 790 deregin tirkedi.
Onyń ishinde belgilengen jyldamdyq mólsherin arttyrýdyń –582, kólik quralyn paıdalaný kezinde uıaly telefonmen sóılesýdiń – 236, qaýipsizdik beldigin paıdalaný erejesin buzýdyń – 549, alkogoldi masań kúıde kólik quralyn basqarýdyń – 39, jaıaý júrginshige jol bermeýdiń – 109, qujattary joq jáne basqarý quqyǵy joq adamnyń kólik quralyn basqarýdyń – 278, manevr qaǵıdasyn buzǵan –255, jaıaý júrginshilerdiń jáne jol júrisine ózge de qatysýshylardyń jol júrisi qaǵıdalarynyń talaptaryn oryndamaýdyń 370 deregi bar.
«Sondaı-aq, baǵdarshamnyń tyıym salatyn sıgnalyna nemese retteýshiniń tyıym salatyn qımylyna qaramaı ótken 60, memlekettik nemese mindetti tehnıkalyq qarap-tekserýden ótpegen kólik quralyn basqarǵan 321, tıisti ruqsatsyz qaıta jabdyqtalǵan kólik quralyn basqarǵan 61 derek anyqtaldy. Al, 13 júrgizýshi kólik quralyn basqarý quqyǵynan aıyrylǵanyna qaramastan rýlge otyrǵan»,-dep habarlady departamenttiń baspasóz qyzmeti.
Bir aptada arnaıy turaqqa 105 avtokólik qoıylǵan.
Eske sala ketelik, budan buryn Atyraýda bir táýlikte 5 mas júrgizýshi ustalǵanyn jazǵan edik.
