Atyraý oblysynda bekire jáne shoqyr balyqtaryn aýlaǵan brakonerler ustaldy
ATYRAÝ. QazAqparat - Búgin Atyraý oblysynda Kaspıı teńizinde orman sharýashylyǵy jáne janýarlar álemi ınspektsııasynyń qyzmetkerleri 304 bekiresi men shoqyr balyqtary bar brakonerlerdi ustady, dep habarlaıdy «QazAqparat» HAA tilshisi.
«Isataı aýdany Jambaı kentiniń mańynda eki qýatty sheteldik motory bar brakonerlik maqsatqa paıdalanylǵan qaıyq ustalyp, odan 304 dana bekire jáne shoqyr balyqtary tárkilendi. Balyqtardyń barlyǵynyń derlik áli tolyq jetile qoımaǵan», - dep habarlady orman sharýashylyǵy jáne janýarlar álemi ınspektsııasynyń basshysy Danııar Baımaǵambetov.
«Tárkilengen balyqtardyń salmaǵy 1 tonna 89 kelini quraıdy. Ustalǵan tórt brakoner de Jambaı kentiniń turǵyndary bolyp shyqty - úsheýiniń jasy 26-da jáne bireýi 24-te. Olardy Damby kentiniń ınspektsııa bólimine alyp ketti. Eki motory bar qaıyq «Arnaıy avtobaza» JShS aýmaǵyna jetkizildi», - dedi ınspektsııa basshysy.
Brakonerlik faktisi boıynsha tergeý jumystary bastaldy.
