Atyraý oblysynda Baýyrjan Momyshuly daýys berdi
Baýyrjan Momyshuly esimdi jas jigit Qyzylqoǵa aýdanyndaǵy Oıyl aýyldyq okrýginde turady.
Ol osyndaǵy №147 saılaý ýchaskesine ákesi Momysh Mámbetqalıev, anasy Maıra Qonarova jáne jubaıy Jaınagúl Mútıevamen birge kelip, daýys berdi.
Ákesi Momysh Mámbetqalıevtyń aıtýynsha, ulyna qaısar, batyl bolsyn degen nıetpen Baýyrjan esimin bergen.
Onyń otbasy eldegi mańyzdy sharalardan qalys qalmaı, kópke úlgi bolyp júredi.
«Aýyldy, eldi kórkeıtý bilimdi, bilikti mamandarǵa, jalpy barshamyzǵa baılanysty bolady. Memlekettiń órkendeýin qalaıtyn azamat retinde osy saılaýdan soń úlken ózgeriske jol ashylady dep esepteımin. Sol sebepten, eldiń bolashaǵyna beıjaı qaraı almadym. Men áıelimdi, ulym men kelinimdi ertip kelip, saılaý ýchaskesinde óz tańdaýymyzdy jasadyq. Bul is jalǵasyn tabady. Ulym da – kópbalaly áke. Ol da áke izin jalǵap, óz urpaǵyna durys jol silteıdi degen senimdemin. Elimiz úshin sanaly ár azamattyń daýysy mańyzdy ǵoı. Al, eldiń birligi men tynyshtyǵy odan da zor mańyzǵa ıe», -deıdi aýyl turǵyny Momysh Mámbetqalıev.
Baýyrjan Momyshulynyń jasy – 30-da. Jylyoı aýdanyndaǵy «Teńiz» kenishinde turbamontajdaýshy bolyp jumys isteıdi.
Eske sala ketelik, buǵan deıin Atyraý oblysyndaǵy munaıshylar daýys berip jatqanyn habarlaǵan bolatynbyz.
