Atyraý oblysynda batpaqaı balyǵy qyrylǵan tusty tikushaqpen izdep jatyr
Jaıyq-Kaspıı oblysaralyq basseındik balyq sharýashylyǵy ınspektsııasy basshysynyń orynbasary Mánshúk Temeshevanyń málimetinshe, 29 tamyzda áleýmettik jelide batpaqaı balyǵynyń qyrylǵany týraly vıdeo taraǵan.
Osyǵan baılanysty basqarmanyń qyzmetkerleri 29 jáne 30 tamyzda Kaspıı teńiziniń jaǵalaýyn teksergen. Onda Atyraý oblysyndaǵy Rakýsha, Tereńózek, sondaı-aq, Mańǵystaý óńirindegi Qalamqas jáne Qarajanbas ýchaskeleri bar.
«Biz oblystyq balyq sharýashylyǵy basqarmasynyń ókilderimen birlesip, Kaspıı teńizi jaǵalaýynyń basym bóligin zerttedik. Máselen, Atyraý oblysyndaǵy Rakýsha, Tereńózek, Prorva, Prorva teńiz kanaly jaǵalaýlaryn araladyq. Іzdeýdi mańǵystaýlyq mamandar da júrgizip jatyr. Ázirge óli balyq tabylǵan joq. Biz tiri batpaqaıdyń shoǵyryn kórdik. Keshe teńiz jaǵalaýyn áýeden barlaý úshin MI-8 tikushaǵy tartyldy», -dep habarlady Mánshúk Temesheva.
Onyń aıtýynsha, búgin, 31 tamyzda tikushaqpen Kaspıı teńiziniń Atyraý men Mańǵystaý oblystarynyń shekarasyndaǵy jaǵalaýy tekseriledi. Sondaı-aq, Mańǵystaý oblysynyń aýmaǵyndaǵy Qalamqas jáne Qarajanbas ken oryndaryna taıaý mańdaǵy jaǵalaý ýchaskeleri zertteletin bolady.
Eske sala ketelik, budan buryn ınspektsııa Kaspııden óli balyqtar tabyldy degen vıdeoǵa túsinik bergeni habarlanǵan bolatyn.
Mańǵystaý oblystyq balyq ınspektsııasynyń basshysy Jaqsyǵalı Іzdibaevtyń aıtýyna qaraǵanda, áleýmettik jelidegi vıdeony Aqtaý qalasynyń turǵyny taratqan.
«Basqarma qyzmetkerleri Tasorpa jerine deıingi jaǵajaı aýmaǵyn tekserip shyqty. Alaıda birde-bir óli balyq tabylǵan joq», -degen edi Jaqsyǵalı Іzdibaev.
