Atyraý oblysynda bastaýysh synyp oqýshylary sabaqty onlaın formatta oqıdy
Bul týraly Atyraý oblystyq bilim basqarmasynyń baspasóz qyzmetinen málim etti.
«Erteń, 9 aqpannan bastap Atyraý qalasy men aýdandardaǵy mektepterdiń 5-11 synyp oqýshylary men kolledj stýdentteri offlaın rejımde oqıdy. Al, 0-4 synyp oqýshylary sabaqty onlaın formatynda jalǵastyrady», -dep habarlady basqarmanyń baspasóz qyzmeti.
Buǵan deıin Atyraý oblysynda eki kún mektep pen kolledjdegi sabaq onlaın formatta ótken edi.
Buǵan munaıly óńirde qar jaýyp, ekpindi jeldiń soqqany sebep bolǵan.
«Atyraý oblysynda kún raıynyń qolaısyzdyǵyna baılanysty qala jáne aýdandardaǵy mektepterde 0-11 synyp oqýshylary, kolledj stýdentteri sabaqty 7 aqpan tústen keıin onlaın formatta oqyp jatyr. Sabaqty onlaın formatta ótkizý ádisi 8 aqpanda da jalǵasady», - dep málim etken edi basqarmanyń baspasóz qyzmetinen.
Eske sala ketelik, Atyraýdy qalyń qar basyp, kólik qozǵalysy qıyndaǵan bolatyn.
«AKZHAYIK Avtopark» JShS keshe, 7 aqpanda saǵat 17:00-de Atyraý qalasyna irgeles ornalasqan eldimekenderge qatynaıtyn 50, 52, 53, 54, 55, 56, 58, 58A, 59, 62, 64-marshrýttaǵy qoǵamdyq kólikter qozǵalysyn toqtatty. Buǵan eldimekenderge jolaýshy tasymaldaıtyn avtobýstardyń qarǵa batyp, júrýi qıyndaǵany sebep bolǵan.
Sondaı-aq, qalyń qar jaýǵan Atyraýda 190 adam qulap, jaraqat alǵan.
Atyraý oblystyq aýrýhanasy travmatologııa bólimshesiniń meńgerýshisi Ashat Bısenǵalıevtiń aıtýynsha, 6 aqpanda 55, 7 aqpanda 70 adamdy qabyldadyq. Búgin, 8 aqpanda túske deıin bólimshege túrli jaraqaty bar 65 adam kelgen. Olardyń qoly, tobyǵy men jelke tusy synǵan.
