Atyraý oblysynda bastaýysh synyp muǵalimi bilim berý ortalyǵyn ashty
ATYRAÝ. QazAqparat - Atyraýdaǵy Inder aýdanynda alǵashqy bilim berý ortalyǵy ashyldy. Ony «Bıznes-Keńesshi» jobasynyń túlegi Janna Ábilova ashty, dep habarlaıdy QazAqparat tilshisi.
Bastaýysh synyp muǵalimi Janna Ábilova mektepke deıingi bilim berý ortalyǵyn ashýdy armandaǵan. Al armannyń oryndalýyna qarajattyń bolmaýy kedergi bolǵan. Kómekke Óńirlik kásipkerler palatasynyń Inder aýdany boıynsha fılıalynyń mamandary keldi. Olar Jannaǵa «Bıznes-Keńesshi» kýrsyn oqýdy usyndy. Muǵalim kelisip, armanyna qaraı qadam jasady.
«Bıznes-Keńesshi» jobasymen oqyp, men «Aýyl sharýashylyǵyn qarjylyq qoldaý qorynyń» 6% jeńildetilgen nesıe boıynsha 4 mln teńge aldym. Osy qarajatqa ortalyqqa kerek nysan satyp aldym, buryn jalǵa alyp otyrǵam. Jumysqa aǵylshyn tili muǵalimin shaqyrdym, sonymen qatar Jumyspen qamtý ortalyǵy arqyly tehnıkalyq qyzmetshini jumysqa aldym. Qazir mende 15 oqýshy bar. Ózim bastaýysh synyptar men mektepke deıingi balalarǵa sabaq beremin. Turǵyndar tarapynan suranys jaqsy. Keleshekte shtatty ulǵaıtqym keledi. Búginde bastaýysh kásipkerler úshin túrli qoldaý baryn atap ótkim keledi», dedi Janna Ábilova.
Aıta ketelik, «Bıznes-Keńesshi» jobasy jumys istep turǵan kásipkerlerge jáne kásip bastaǵysy keletin azamattarǵa arnalǵan qysqa merzimdi oqytý. Oqý barysynda tyńdaýshylarǵa qalaı kásip bastaý kerek, marketın negizderi, adamı kapıtaldy basqarý, bıznesti zań turǵysynan júrgizý, qarjy boıynsha aqparat beriledi.
Tyńdaýshylarǵa kásipkerlik negizderi boıynsha kórnekilik quraldar, oqýlyqtar men materıaldar beriledi. Al oqý aıaqtalǵan soń beriletin sertıfıkat granttyq qarjylandyrý baıqaýyna qatysýǵa jáne damý bankteri nesıelerin alýǵa múmkindik beredi.
