Atyraý oblysynda balyqtyń qyrylý qaýpi joǵary

ATYRAÝ. QazAqparat – Atyraý oblysynda sý aıdyndarynyń qýraǵan aǵash pen ósimdikterden tazalanbaýy balyqtyń qyrylýyna ákep soqtyrýy múmkin. Bul týraly oblys ákiminiń orynbasary Qaırat Nurtaevtyń tóraǵalyǵymen ótken sý aıdyndarynda balyqtyń jappaı qyrylýynyń aldyn alý jónindegi jıynda belgili boldy, dep habarlaıdy QazAqparat tilshisi.

Oblystyq Balyq sharýashylyǵy basqarmasynyń basshysy Artýr Sádibekulynyń aıtýynsha, balyqtardyń qyrylý qaýpin boldyrmaý úshin 2021-2025 jyldarǵa arnalǵan birneshe aýqymdy shara daıyndalǵan.

«Qazir sý aıdyndarynda balyq qyrylýy múmkin qaýipti aımaqtardyń tizimi jasaqtalyp, baqylaý jumystary kúsheıtildi.​ Ár toqsan saıyn atqarylǵan jumystarǵa taldaý júrgiziledi. Orman qorynyń aýmaǵyndaǵy sý aıdyndarynda balyqtyń qyrylý qaýpi óte joǵary deńgeıde saqtalyp otyr. Óıtkeni, orman qoryndaǵy sý kózderi qýraǵan aǵashtar men ósimdikterden tazalanbaǵan. Bul shabaqtyń erkin qozǵalysyna kedergi keltirip, qyrylýyna ákep soqtyrýy múmkin», - deıdi Artýr Sádibekuly.

Eske salaıyq, budan buryn Atyraý qalasynyń mańynda balyq qyrylǵanyn jazǵan edik.

Jaıyq-Kaspıı oblysaralyq basseındik balyq sharýashylyǵy ınspektsııasynyń basshysy Nurlybek Ǵaısınniń aıtýynsha, jaǵdaıǵa sebep – balyqtyń taıaz jerge shyǵyp qalýy.

Keıin Mahambet aýdanyndaǵy Almaǵambet kólinde balyqtyń qyrylǵany belgili boldy.

«Kúnniń ysýyna baılanysty kóldegi ottegi azaıyp, shabaqtar úshin qaýip tóngen. Nátıjesinde balyqtar qyrylǵan. Ólgen balyqtar súzilip, sanıtarlyq talaptarǵa saı kómiledi. Al, kólden 300 metr qashyqtaǵy arnanyń ózinde sý tereń bolǵandyqtan, onda balyqtyń ólýi tirkelgen joq. Almaǵambet sý aıdyny orman alqabyna kiredi. Bul jerdegi jyńǵyldardy julý, joıý, qazý jumystaryn júrgizý úshin arnaıy ruqsat alý qajet», -degen edi basqarma basshysy Artýr Sádibekuly.