Atyraý oblysynda balyq satatyn barlyq oryndar baqylaýǵa alyndy
ASTANA. QazAqparat - QR Energetıka mınıstrligi bıyl aqpan aıynda Peretaska kanalynda tabylǵan óli balyqtardyń qaıdan shyqqany týraly túsinik berdi, dep habarlaıdy QazAqparat.
«2019 jylǵy 25 aqpan kúni Jaıyq ózenine quıatyn Peretaska kanalynda óli balyqtar tabyldy, shamamen 15 keli jınalǵan. Vedomstvoaralyq komıssııanyń mamandary bul faktini rastap, ólgen balyq muz erigennen keıin sý betine shyqqanyn atap ótti. Bul jaǵdaı ótken jyldyń jeltoqsanynda Jaıyq ózeninde bolǵan balyqtardyń jappaı qyrylýyna baılanysty», - delingen mınıstrliktiń baspasóz qyzmeti taratqan málimette.
Atyraý oblysy ákimdiginiń aqparatyna qaraǵanda, 2019 jylǵy 15 qańtar men 15 aqpan aralyǵynda balyq aýlaý jumystary júrgizildi. Orman sharýashylyǵy jáne janýarlar dúnıesi komıtetiniń mamandary, sondaı-aq "Qazaq balyq sharýashylyǵy ǴZI" JShS ǵylymı qyzmetkerleri aýlanǵan tiri balyqtarǵa zertteý júrgizdi. Mamandardyń derekteri boıynsha, ólgen nemese aýrý balyqtar tirkelmegen. Aýlanǵan balyqtardyń jaǵdaıy turaqty dep belgilengen.
Buǵan deıin, ıaǵnı 2018 jyldyń 26 jeltoqsanynda Jaıyq ózeniniń eki ýchaskesinde súńgýirler sý aıdynyna tekserý júrgizdi. Osyndaı jumys 2019 jyldyń 4 aqpanynda da atqaryldy, onda súńgýirler 10 ýchaske boıynsha ózen túbin qarap shyqty, óli balyqtar tabylmady.
«Qazirgi ýaqytta ózendegi jaǵdaı jergilikti atqarýshy organdar men Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń kúndelikti baqylaýynda. Balyq ónimderin satatyn barlyq núkteler veterınarlar men polıtsııa qyzmetkerleriniń baqylaýynda», - delingen habarlamada.
Budan buryn habarlanǵandaı, QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet jaqyn Atyraý oblysynyń aýmaǵynyń sý aıdyndarynda balyq qyrylýy oqıǵasy tirkelmegenin aıtqan bolatyn.
«Eger bul Atyraýda túsirilgen vıdeo bolsa, onda byltyr jeltoqsanda qyrylǵan balyqtardyń ólekseleri nemese balyqtardyń tabıǵı ólýi. Muz erigende ár sý aıdynynan qysta ólgen balyqtardyń ólekseleri shyǵyp jatady. Ol ýaqytynda aýa jibermegennen bolady. Qazirgi tańda Atyraýda balyq qyrylyp jatqan joq. Mamandar barlyq sý aıdyndardy baqylaýda ustaýda», - dep jaýap berdi S. Dildahmet.
Eske sala ketsek, 2018 jyly jeltoqsanda Atyraý oblysynda balyqtyń qyrylǵany týraly birneshe aqparat taratqan bolatynbyz. Naqtyraq aıtqanda, Atyraý qalasynyń syrtyndaǵy Peretaska shaǵyn ózeninde balyqtardyń jappaı qyrylý oqıǵasy tirkelgen edi.
Arada apta ótpeı Atyraý oblysyndaǵy Jaıyq ózeninde balyqtardyń jappaı qyrylǵany anyqtalǵan.
