Atyraý oblysynda balyq ósirýge 2 mlrd teńge ınvestıtsııa salynady
Bul týraly turǵyndar aldynda esep bergen Qurmanǵazy aýdanynyń ákimi Qaırat Nurtaev málim etti.
Onyń aıtýynsha, «SevKaspıı FISh» JShS 2 mlrd teńge ınvestıtsııa salý arqyly balyq qoryn kóbeıtýdi kózdep otyr. Atalǵan seriktestik bekire tuqymdas jáne qara balyqtardyń 10 mılıonnan astam shabaǵyn qoldan ósirip, Qıǵash ózenine jibermek. Buǵan qosa, toǵan sharýashylyǵyn damytý qolǵa alynady.
«Bul jobany iske asyrýdyń nátıjesinde 1000-nan asa adam turaqty jumyspen qamtylady dep kútilýde. Budan bólek, balyq, egin, mal jáne qus sharýashylyǵyn damytý maqsatynda Qıǵash ózeninde 243,55 kılometrdi quraıtyn janama kanaldardyń túbi tereńdetiledi. Sondaı-aq, 75 shaqyrymdyq «Kobıakovo-Zabýrýne» sýlandyrý júıesin qaıta jańǵyrtý josparlanyp otyr» deıdi aýdan ákimi Qaırat Nurtaev.
