Atyraý oblysynda balyq óndirisi 15 myń tonnaǵa deıin artady
Mundaı málimetter Atyraý oblysynda ótken óńirdiń balyq sharýashylyǵyn damytý jónindegi keńes barysynda aıtyldy.
Kezdesý QR Ekologııa, geologııa jáne tabıǵı resýrstar mınıstri Maǵzum Myrzaǵalıevtiń tóraǵalyǵymen ótti.
Osylaısha, balyq sharýashylyǵyn damytýdyń óńirlik baǵdarlamasy aıasynda 2030 jylǵa qaraı Kaspıı teńizindegi teńiz balyq aýlaýdy arttyrý esebinen kásiptik balyq aýlaý kólemin 13 myń tonnadan 25 myń tonnaǵa deıin, al balyq ónimderiniń eksportyn 6 myń tonnadan 25 myń tonnaǵa deıin arttyrý josparlanǵany aıtyldy.
«Bıyl Atyraý oblysynda jumys istep turǵan sharýashylyqtar 10 myń tonna taýarly balyq ósirýdi josparlap otyr, bul - 2020 jylǵa qaraǵanda 1,5 tonnaǵa artyq. 2030 jylǵa qaraı bul kórsetkishti 15 myń tonnaǵa deıin arttyrý josparlanyp otyr»,- dedi ekologııa mınıstrligi balyq sharýashylyǵy komıtetiniń tóraǵasy Narıman Júnisov.
«Amangeldi atyndaǵy» JShS iri balyq aýlaý kásipornyna jatatyn «SevKaspııFısh» JShS qarjy dırektory Salamat Omarov Atyraý oblysynyń Qurmanǵazy aýdanynda jalpy aýdany 850-900 ga jer ýchaskesinde 1100 tonnaǵa josparlanǵan balyq akvamádenıetiniń óndirisi týraly habardar etti.
«Biz akvamádenıetti belsendi damytýdy josparlap otyrmyz. Balyq sharýashylyǵyn damytýdyń 2030 jylǵa deıingi baǵdarlamasy elimizde akvaósirý ortalyqtaryn qurýǵa oń serpin beredi. Bul jumysta memlekettiń qoldaýy mańyzdy»,- dedi kompanııa ókili.
Maǵzum Myrzaǵalıev búgingi kúni elimizdiń balyq salasynda aýqymdy mindetter qoıylǵanyn atap ótti.
«Memleket basshysy Qasym-Jomart Toqaev qyrkúıek aıyndaǵy Qazaqstan halqyna Joldaýynda elimizdiń balyq sharýashylyǵyn damytýdyń mańyzyn erekshe atap ótti. Júıeli sharalar qabyldanǵan jaǵdaıda elimizde balyq ósirý kólemin 600 myń tonnaǵa deıin jetkizý josparlanǵan. Sondaı-aq, balyq eksportyn 300 myń tonnaǵa deıin jetkizý josparlanyp otyr. Belgilengen josparlardy tıimdi iske asyrý úshin mınıstrlik janynan salalyq Komıtet quryldy, ol birinshi kezekte halyqty sapaly ári qoljetimdi balyq ónimimen qamtamasyz etý jáne elde balyq sharýashylyǵyn damytý úshin qolaıly jaǵdaılar jasaý úshin sharalar qabyldaıtyn bolady», - dep atap ótti mınıstr.
Sondaı-aq, Maǵzum Myrzaǵalıev eldegi balyq sharýashylyǵynda Atyraý óńiriniń alatyn orny erekshe ekendigine nazar aýdardy.
«Qazaqstanda aýlanatyn balyqtyń 30 paıyzǵa jýyǵy - osy oblysqa tıesili. Kaspııge quıatyn eki iri balyq sharýashylyǵy sý aıdyndary – Jaıyq pen Qıǵash ózenderinde 20 tabıǵat paıdalanýshy óz kásibin júrgizip otyr», - dep túıindedi ol.
Esterińizge sala keteıik, ekologııa mınıstri óńir turǵyndaryna jańa Ekologııa kodeksiniń normalaryn túsindirý maqsatynda jumys saparymen Atyraý oblysyna bardy.
Sapar aıasynda vedomstvo basshysy Atyraý munaı óńdeý zaýytyna, «Kaspıı bekiresi lımıted» JShS torly sharýashylyǵyna jáne Oral-Atyraý bekire zaýytyna bardy.
