Atyraý oblysynda balalardy asyrap alý deńgeıi edáýir artty - B. Іzmuhambetov
ASTANA. 27 qyrkúıek. QazAqparat - Atyraý oblysynda balalardy asyrap alý deńgeıi eleýli kólemde artty.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Baqtyqoja Іzmuhambetov málim etti. «Balalardy asyraýǵa alyp jatqan adamdar negizinen atyraýlyqtar. Men bul máseleni muqııat qarap shyqtym. Tek sońǵy bir jarym jyldyń ishinde asyrap alǵan balalardyń sany boıynsha 10 jylda bolmaǵan kórsetkishten asyp otyr. Biz bir balalar úıin japtyq jáne taǵy bir balalar úıindegi jetkinshekterdiń sany kádimgideı azaıdy. Buny jaqsyǵa balap otyrmyz, birinshiden - bul adamdardyń turmystyq jaǵdaıy túzelgendigin kórsetedi»,-dedi ákim. Osy oraıda Atyraý oblysyndaǵy ortasha jalaqy kólemi respýblıka boıynsha eń joǵary deńgeıde ekenin sóz etti ol. «Ekinshiden - adamdardyń sábılerge, óskeleń urpaqqa degen kózqarasyn kórsetip otyr. Osynyń barlyǵyn oblysta júrgizilip jatqan jumystardyń nátıjesi dep oılaımyn». Sonymen qatar jetim balalardy sheteldikterdiń asyrap alýyna berý máselesine toqtalǵan ákim, «árıne, 90-shy jyldardaǵy ekonomıkalyq qıyndyqtarǵa baılanysty, sondaı-aq balalar úılerinde dertke shaldyqqan, múgedek balalardy túgel qamtı almaýyna oraı osyndaı jaǵdaılar bolǵan. Qazir jaǵdaı túzelýde. Balalar úıindegi jetkinshekter sany azaıyp keledi. Sondyqtan óz balalarymyz ózimizdiń jerimizde tárbıe alyp, emdelgeni durys dep oılaımyn. Halqymyzdyń sanynyń azaıǵany bizge eshqashan da abyroı ákelmeıdi»,-dep túıdi Baqtyqoja Іzmuhambetov.
