Atyraý oblysynda azyq-túlik baǵasyn turaqtandyrýǵa 1 mlrd 35 mln teńge bólindi
«Atyraý» áleýmettik kásipkerlik korporatsııasy» AQ memlekettik baǵdarlamalardy iske asyrý departamentiniń dırektory Dmıtrıı Dıýdiń málimetine súıensek, turaqtandyrý qorynyń qoımasynda 216 tonna azyq-túlik, 2 379 tonna aýyl sharýashylyǵy ónimderi bar.
«Áleýmettik mańyzy bar taýarlardyń baǵasyn turaqtandyrý úshin «Atyraý» ÁKK» AQ tórt saýda jelisi men taýar óndirýshilerge aınalym qarajatyn tolyqtyrý úshin 1 mlrd 35 mln teńge kóleminde qaryz berdi. Bul qarajattyń qaıtarymy bolady. Kásipkerler aldynda áleýmettik mańyzy bar 19 túrli azyq-túlik taýarynyń baǵasyn turaqtandyrý mindeti tur», -deıdi Dmıtrıı Dıý.
Onyń aıtýyna qaraǵanda, «Lıder» jáne «Ideal» sýpermarketteriniń 39 núktesinde azyq-túlikter naryq baǵasynan 33%-ǵa tómen baǵamen satylyp jatyr. Taýarlar kún saıyn saýda oryndaryna jetkiziledi. Turaqtandyrý qory arqyly jetkziletin azyq-túlik ónimderi sýpermarketter jelisinde «Turaqtandyrý qorynyń taýarlary» degen jazýy bar arnaıy sórege ornalastyrylǵan.
«Aýyl sharýashylyǵy taýarlary Atyraý qalasyndaǵy 4 bazarda naryq baǵasynan 63% tómen baǵamen satylady. Máselen, birinshi surypty unnan pisirilgen nan baǵasy – 80-82 teńge. Al, sıyr eti (súıegi bar jaýyryn-tós bóligi) – 1853, on jumyrtqa – 360, kartop – 185, pııaz – 80, sábiz – 145, qyryqqabat – 125, qyzylsha baǵasy 170 teńge turady. Kókónister «Dına», «Saraıshyq», «Nasıha» jáne «Kóktem» bazarlarynda satylymǵa qoıyldy», -dep málim etti Dmıtrıı Dıý.
Eske sala ketelik, buǵan deıin Atyraý oblysynda áleýmettik mańyzy bar azyq-túliktiń qajetti qory baryn https://kaz.inform.kz/news/atyrau-oblysynda-aleumettik-manyzy-bar-azyk-tuliktin-kazhetti-kory-bar_a3884011 jazǵan bolatynbyz.