Atyraý oblysynda avtogaz tapshylyǵyn joıý máselesi qolǵa alyndy
Energetıka mınıstrligi Atyraý jáne Batys Qazaqstan oblystaryn avtogazben úzdiksiz qamtamasyz etý úshin suıytylǵan munaı gazynyń qosymsha kólemin bólý boıynsha jumystar júrgizýdi qolǵa aldy.
«Máselen, Atyraý oblysyna qarasha aıyna «Qazaqoıl-Aqtóbe» JShS, «Gas Processing Company» JShS jáne «SNPS-Aqtóbemunaıgaz» AQ qosymsha 2 108 tonna bóldi. Onyń ishinde 16 qarashadaǵy jaǵdaı boıynsha 521 tonnasy jetkizildi. Batys Qazaqstan oblysyna qarasha aıyna «SNPS-Aqtóbemunaıgaz» AQ-dan qosymsha 504 tonna bólindi. Oral qalasynda ornalasqan «Jaıyqmunaı» JShS-men kún saıyn aıyrbastaý negizinde keminde 60 tonna suıytylǵan munaı gazyn tıep-jónelte otyryp, qosymsha 400 tonna bólý týraly ýaǵdalastyqqa qol jetkizildi. Bul Atyraý munaı óńdeý zaýyty (AMÓZ) tolyq jumys rejımine shyqqannan keıin óteletin bolady», - dep habarlady mınıstrliktiń baspasóz qyzmetinen.
Sondaı-aq Energetıka mınıstrligi «Teńizshevroıl» JShS basshylarymen BQO jáne Atyraý oblysyna 1 600 tonnadan qosymsha suıytylǵan munaı gazyn bólý týraly kelisim jasady. Qazir suıytylǵan munaı gazyn ótkizýshi sýbektiler Energetıka mınıstrligi bólgen gaz kólemine joǵaryda atalǵan zaýyttarmen kelisimshart jasap jatyr.
«QazMunaıGaz» UK» AQ aqparatyna sáıkes, Atyraý munaı óńdeý zaýytynda aǵymdaǵy jóndeý jumystaryn júrgizý úshin 7-14 qarasha aralyǵynda suıytylǵyn munaı gazyn saqtaý parkine aıdaýdy toqtatylǵan. Zaýyt tolyq jumys rejımine 28 qarashada shyǵatyny josparlanyp otyr. Alaıda, 23 qarashadan bastap qondyrǵylardy kezeń-kezeńimen iske qosý boıynsha qabyldanǵan sharalar táýligine 600 tonna óndirýge múmkindik beredi. Bul ónim suıytylǵan munaı gazynyń jetispeýshiligin boldyrmaýǵa baǵyttalatyn bolady.
Eske salaıyq, buǵan deıin Atyraý oblysynda avtogaz tapshylyǵynyń týyndaý sebebi aıtylǵan bolatyn. Keıin Atyraý munaı óńdeý zaýytynda jóndeýden soń táýligine 400 tonnaǵa deıin gaz óndirile bastaıtyny habarlandy.
Foto: alaniaportal.ru
