Atyraý oblysynda aýyldaǵy saıabaqty kúrdeli jóndeýge 100 mln teńge bólindi
Muqyr aýyldyq okrýginiń ákimi Azamat Jaqsıevtiń málimetinshe, munda 5 myńǵa jýyq adam turady. Bıyl «Aýyl – el besigi» baǵdarlamasymen aýyldaǵy ortalyq saıabaqta kúrdeli jóndeý bastalady.
«Ortalyq saıabaqtyń kúrdeli jóndeý jumystaryna 100 mln 797 myń teńge bólinip otyr. Bul jumysty merdiger «Jaıyq Sıtı» JShS júrgizedi. Saıabaqta demalys oryndary, merekelik is-sharalar ótkizýge arnalǵan jazǵy sahna, Ekinshi dúnıejúzilik soǵystan oralmaǵan bozdaqtar men maıdangerler aty-jóni jazylǵan taqta, balalar oıyn alańy jasaqtalady. Kógaldandyrý jumystary qolǵa alynady. Jóndeý jumysy kelesi jyldyń sońynda aıaqtalady», - deıdi Azamat Jaqsıev.
Qazir Muqyrda ne klýb, ne mádenıet úıi joq. Aýylda 2017 jyly mádenıet úıiniń qurylysy bastalǵanmen, áli tolyq bitpeı, toqtap tur. Al, saıabaq birneshe jyldan beri qaraýsyz, jóndeýsiz qalǵan.
Muqyr aýyldyq klýbynyń dırektory Asqar Esenǵalıdyń aıtýynsha, 15 jyldan beri mekteptiń akt zaly jaldanyp otyr. Mádenı is-sharanyń barlyǵy osy Muqyr orta mektebiniń akt zalynda ótedi. Mýzykalyq aspaptar aıadaı bólmede tur.
«Mekteptiń akt zalyn aýyldyq klýbtyń jalǵa alǵany bizge ońaı bolmaı tur. Óıtkeni, mekteptiń de ótkizetin tárbıelik is-sharalary bar. Klýb pen mektep bir mezgilde is-shara ótkizýdi josparlasa, bir-birimizge kedergi keltiretinimizdi jasyra almaımyn», - deıdi Muqyr orta mektebiniń dırektory Venera Myrzaǵalı.
Eske sala ketelik, buǵan deıin Atyraý oblysynda «Aýyl – el besigi» baǵdarlamasymen 15 aýyl damıtynyn jazǵan edik.