Atyraý oblysynda aýyl kásipkeri buqtyrylǵan túıe etin qalbyrǵa salyp shyǵarady
Isataı aýdanynyń Janbaı aýylynda turatyn Aınur Sısekenova jańa ónim shyǵarýdy qolǵa aldy.
«Suranysqa ıe otandyq ónimdi shyǵarý úshin úlken shaharda turý shart emes. Halyq tutynatyn sapaly ónimdi alystaǵy aýylda da shyǵarýǵa bolady. Mundaı isti qolǵa alý úshin aldymen ynta qajet. Іzdengen adamnyń isi alǵa basady», -deıdi aýyl kásipkeri Aınur Sısekenova.
Onyń aıtýynsha, birneshe jyldan beri «Temirlan» jeke kásipkerligi et jáne shujyq ónimderiniń onnan astam túrin daıyndaıdy. Endi jaqynda «Naryn» ataýymen túıe etinen jasalǵan ónimdi naryqqa shyǵara bastady.
«Alǵash kásibimdi «Bastaý Bıznes» jobasymen shaǵyn dúken ashýdan bastaǵan edim. Keıin zamanaýı tehnologııa ornatylǵan shaǵyn tseh ashtym. Qazir 10-ǵa jýyq aýyldasymdy jumysqa tarttym. Shaǵyn tsehymyzda et jáne shujyq ónimderin daıyndaımyz. Bári – otandyq ónim. Sol sebepten shyǵar, tutynýshynyń suranysy artyp tur. Munda jartylaı fabrıkat ónimderi de bar. Aldymen tutynýshy talabyna erekshe mán berip, ónim sapasyn arttyrýdy kózdeımiz. Jaqynda túıe etin konservige salyp shyǵara bastadyq», -deıdi Aınur Sısekenova.
Qalbyrdy Almaty qalasynan aldyrady. Ónim sapaly bolýy úshin qalbyrlar mindetti túrde zalalsyzdandyrylady. Arnaıy qurylǵymen týralǵan túıe etin tuzdap qoıamyz. Sodan keıin ǵana qalbyrǵa salynady.
«Túıe eti salynǵan qalbyrdaǵy ónimdi ázirge Isataı aýdanynyń turǵyndaryna usynyp otyrmyz. Baǵasy – 1 myń teńge. Aldaǵy ýaqytta ózge aýdandar men óńirlerge jiberýdi kózdedik», -deıdi Aınur Sısekenova.
Eske sala ketelik, udan buryn Atyraýda Atyraý oblysynda 35 myń bıznes nysandy qyz-kelinshekter basqaryp otyrǵanyn jazǵan bolatynbyz.