Atyraý oblysynda «Aýyl – el besigi» baǵdarlamasymen 15 aýyl damıdy
Oblystyq ekonomıka jáne bıýdjettik josparlaý basqarmasy basshysynyń mindetin atqarýshy Rafık Ábýovtiń málimetinshe, munaıly óńirde 153 aýyl bar.
«Atyraý oblysynda «Aýyl – el besigi» baǵdarlamasy aıasynda damý áleýeti bar 93 aýyl iriktelip alynǵan edi. Máselen, 2019-2022 jyldary atalǵan baǵdarlamamen 40 aýyl qamtyldy. Úsh jylda bıýdjetten 24 mlrd teńge qaralyp, 41 joba iske asyryldy. Bul turǵyn úı-kommýnaldyq sharýashylyǵyna qatysty 15, bilim berý, densaýlyq saqtaý, sport salalaryndaǵy 20 nysandy salýǵa múmkindik berdi. Kólik ınfraqurylymyn damytý úshin 6 nysan jańartyldy. Al, bıyl 15 aýyldy damytý úshin respýblıkalyq bıýdjetten 5,8 mlrd teńge bólinip, 22 jobany iske asyrý josparlanyp otyr», - dep habarlady Rafık Ábýov.
Onyń aıtýynsha, «Aýyl – el besigi» baǵdarlamasy aıasynda úsh jylda 768 jumys orny ashylǵan. Máselen, Maqat aýdanynda byltyr 2 mlrd 36 mln teńgeniń 6 jobasy qolǵa alynǵan. Onyń ishinde 4 jobanyń qurylysy aıaqtalǵan.
«Dossor kentinde 4 oıyn alańynyń qurylysy bastalady. Oǵan 288 mln teńge bólinip otyr. Al, aýdan ortalyǵy – Maqat kentinde stadıonnyń qurylysyn júrgizý josparlanyp otyr. Stadıon fýtbol, basketbol, voleıbol alańdarymen qamtylady», - deıdi Maqat aýdany ákiminiń orynbasary Azamat Shańǵalaev.
Eske sala ketelik, buǵan deıin Atyraý oblysynda «Aýyl amanaty» jobasyn qarjylandyrýǵa 1,5 mlrd teńge bólingenin jazǵan bolatynbyz.
