Atyraý oblysynda aýrýhanalardyń kásipkerlerge qaryzy 1,4 mlrd teńgeden asady
Oblys ákimi Serik Shápkenovtiń tóraǵalyǵymen quqyq buzýshylyq profılaktıkasy jáne sybaılas jemqorlyqqa qarsy is-qımyl máseleleri jónindegi vedomstvoaralyq komıssııanyń otyrysy ótti. Sybaılas jemqorlyqqa qarsy is-qımyl departamentiniń basshysy Erulan Serikqalıevtyń málimetinshe, densaýlyq saqtaý salasyndaǵy mekemelerdiń memlekettik satyp alý josparyna monıtorıng júrgizilgen.
«Monıtorıng qorytyndysymen sońǵy 2 jylda 81 mln teńgeden astam qarjy únemdeldi. Máselen, Geolog eldi mekenindegi emhanada memlekettik satyp alý portaly arqyly 30 medıtsınalyq kreslo satyp alý jospary bolǵan. Departamenttiń usynysymen bul emhanada 24 mln teńgeden astam qarjy únemdelip otyr. Densaýlyq saqtaý basqarmasyna qarasty keı aýrýhanalar 208 bıznes sýbektisine qaryzy – 1 mlrd 449 mln 565 myń 646 teńge», -dep habarlady Erulan Serikqalıev.
Onyń aıtýynsha, bıyl sybaılas jemqorlyqqa qarsy komplaens-ofıtserlermen sybaılas jemqorlyq táýekeline 118 márte ishki taldaý júrgizilgen.
«Máselen, №2 oblystyq aýrýhanasynyń komplaens-ofıtseri júrgizgen taldaýdyń nátıjesinde memlekettik satyp alý menedjeriniń tarapynan zań buzýshylyq anyqtaldy. Aýrýhanada memlekettik satyp alý boıynsha 2021 jyly 67 mln teńge, al byltyr 10 mln teńge bıýdjet qarajaty talan-tarajǵa salynǵan. H.Dosmuhamedov atyndaǵy Atyraý memlekettik ýnıversıtetiniń komplaens-qyzmetkerleri 8 quqyq buzýshylyqty anyqtap otyr. Munda oqytýshylardyń «Platonýs» júıesi arqyly onlaın formatta stýdentter atynan emtıhan tapsyrǵany, úlgerimi nashar stýdentterdiń baǵasyn kóterý maqsatynda májbúrli túrde aqshalaı syıaqy alý deregi tirkeldi», -dep málim etti Erulan Serikqalıev.
Eske sala ketelik, budan buryn Kvazısektor men memlekettik organdar atyraýlyq kásipkerlerge 1 mlrd teńgege jýyq bereshegin ótegenin jazǵan edik.
