Atyraý oblysynda aýany lastaıtyn kásiporyndar anyqtaldy
ATYRAÝ. QazAqparat – Atyraý oblysynda aýany lastaıtyn kásiporyndar anyqtaldy, dep habarlaıdy QazAqparat.
Ekologııalyq retteý jáne baqylaý komıtetiniń tóraǵasy Zulfyhar Joldasovtyń málimetine súıensek, byltyr Atyraý oblysynda atmosferalyq aýany kúkirtsýtegimen lastaýǵa baılanysty 238 joǵary jáne 4 ekstremaldy deregi tirkelgen.
«Bul 2020 jylǵy kórsetkishten 161-ge jáne 2-ge kóp. Onyń 46%-y Maqat aýdanyndaǵy «Bolashaq» munaı men gazdy keshendi daıyndaý qondyrǵysy men NCOC kompanııasynyń basqa da nysandarynda bolǵan. Al, 38%-y Atyraý munaı óńdeý zaýytynyń qaldyqtary tastalatyn «Týhlaıa balka» alańynda tirkelgen. Qazir munda Jol kartasy aıasynda qalpyna keltirý jumystary júrgizilip jatyr. Sondaı-aq, 16%-y qaladan qaldyqtar tasymaldanatyn «Kvadrat» býlaný alańyna tıesili bolyp otyr. Osyǵan baılanysty Atyraý qalasynyń oń jaǵynda kárizdik tazartý qurylǵyny qaıta jańartý úshin jobalyq-smetalyq qujattama ázirlenipı jatyr. Jańa nysannyń qýaty táýligine 31 myń tekshe metrdi quraıdy. Merdiger retinde «Qurylys Ekspert Proekt» JShS anyqtaldy», -dep habarlady Zulfyhar Joldasov.
Onyń aıtýynsha, oblystyq ekologııa departamenti atmosferalyq aýany kúkirtsýtegimen lastaý deregine qatysty jospardan tys 5 tekserý júrgizgen. Onyń ishinde «AMÓZ» JShS 2, NCOC kompanııasy 2, «QazTransOıl» AQ 1 ret tekserilgen.
«Tekserý nátıjesimen NCOC kompanııasynyń nysandaryndaǵy sarqyndy sýdyń quramynda kúkirtsýtek bar ekeni anyqtaldy. Qazir sot talqylaýy júrip jatyr», -dep málim etti Zulfyhar Joldasov.
Eske sala ketelik, buǵan deıin Atyraý oblysynyń bıýdjetine ekologııalyq tólemderden 9 mlrd teńge túskenin habarlaǵan edik.
